ABŞ-də aviasiya böhranı: Uçuşlara qoyulan qadağa ləğv edilib
ABŞ-də hava hərəkətinin idarəetmə sistemində yaranan texniki nasazlıq səbəbindən ölkə üzrə təyyarələrin havaya qalxmasına tətbiq edilən qadağa təxminən 4,5 saatdan sonra ləğv olunub.
Crossmedia.az xəbər verir ki, “Associated Press” agentliyi bu barədə məlumat yayıb.
ABŞ Federal Aviasiya Administrasiyası (FAA) noyabrın 13-də fövqəladə vəziyyət və uçuş təhlükəsizliyi səbəbindən bütün ölkə üzrə təyyarələrin havaya qalxmasını müvəqqəti dayandırıb.
Qərara hava hərəkətinə nəzarət mərkəzlərində radio rabitəsi və radar sistemlərinin işində yaranan problemlər səbəb olub.
Qadağa zamanı artıq havada olan təyyarələrin enişinə icazə verilib. Beynəlxalq reyslərlə bağlı qərarlar isə fərdi qaydada qəbul edilib.
ABŞ-nin nəqliyyat naziri Şon Daffi bildirib ki, nasazlıq köhnəlmiş rabitə avadanlıqlarının həddindən artıq yüklənməsi ilə əlaqəli olub.
Daxili təhlükəsizlik naziri Markveyn Mallin isə hadisənin kiberhücum nəticəsində baş verdiyinə dair hər hansı sübut aşkarlanmadığını açıqlayıb.
FAA texniki problemlərin aradan qaldırılmasından sonra uçuşların bərpasına icazə verib. Bununla belə, nasazlıq minlərlə reysin gecikməsinə və ləğvinə səbəb olub.
Aviaşirkətlər uçuş cədvəllərinin tam normallaşmasının müəyyən vaxt aparacağını bildiriblər.
09:10 14.11.2026
Oxunuş sayı: 88
