Almaniya və Fransadan Aİ-yə yeni ticarət təklifi gəldi
Almaniya və Fransa Avropa İttifaqına ticarətdən siyasi təzyiq vasitəsi kimi istifadə edən ölkələrə qarşı yeni tədbir görülməsini təklif edib.
Crossmedia.az xəbər verir ki, “Bloomberg” bu barədə Berlin və Parisin Avropa Komissiyasının Prezidenti Ursula fon der Lyayenə göndərdiyi təklifə istinadən məlumat yayıb.
Təklifə əsasən, Aİ-yə vahid bazara çıxışı ticarətdən təzyiq vasitəsi kimi istifadə edən ölkələr üçün məhdudlaşdırmaq səlahiyyəti verilə bilər. Sənəddə Çinin adı birbaşa çəkilməsə də, təşəbbüsün əsasən Avropanın Çindən tədarük asılılığı və dövlət subsidiyaları ilə dəstəklənən Çin istehsalçıları ilə rəqabətlə bağlı olduğu bildirilir.
Vahid bazara çıxışın məhdudlaşdırılması son tədbir kimi nəzərdə tutulur. Məsələn, ölkənin kritik əhəmiyyətli nadir torpaq elementlərinin ixracını dayandırması belə addımın tətbiqi üçün əsas ola bilər.
Almaniya və Fransa həmçinin bütöv sənaye sahələrində haqsız rəqabətlə bağlı araşdırmaların sürətləndirilməsini təklif edir. Söhbət kimya, plastik istehsalı və hibrid avtomobillər də daxil olmaqla bir sıra sektorlardan gedir.
Qeyd olunur ki, bunlar hələlik yalnız təkliflərdir və onların qüvvəyə minməsi üçün Avropa İttifaqının müvafiq institutlarının təsdiqi tələb olunur.
18:14 06.10.2026
Oxunuş sayı: 55
