Gəncə terroru: Altı il sonra dəyişməyən həqiqət və unudulmayan izlər
Gəncə terrorundan altı il ötsə də, 44 günlük Vətən müharibəsi zamanı Azərbaycanın ikinci böyük şəhərinə endirilən raket zərbələrinin acı nəticələri xalqımızın yaddaşından silinməyib. Ermənistan silahlı qüvvələrinin dinc yaşayış məntəqələrini hədəfə alması nəticəsində mülki şəxslərin, o cümlədən uşaqların həyatını itirməsi və yaralanması müharibə zamanı Azərbaycanın yalnız cəbhə xəttində deyil, şəhərlərində də hücumlara məruz qaldığını göstərdi.
Gəncəyə raket hücumları nəticəsində yaşayış binaları və mülki infrastruktur dağıdılıb, çoxsaylı insan həyatını itirib və yaralanıb. Hadisənin ildönümündə faciənin qurbanlarının xatirəsinin yaşadılması ilə yanaşı, həmin günlərdə baş verənlərin sənədləşdirilməsi, tarixi faktların qorunması və gələcək nəsillərə çatdırılması məsələsi də yenidən gündəmə gəlir. Bəs Gəncə terrorunun tarixi yaddaşda qorunması və beynəlxalq ictimaiyyətə çatdırılması üçün hansı addımlar atılmalıdır?
Mövzu ilə bağlı Milli Məclisin deputatı Jalə Əliyeva Crossmedia.az-a açıqlamasında bildirib ki, Gəncə terrorunun qurbanlarının xatirəsinin yaşadılması ilk növbədə tarixi həqiqətlərin sistemli şəkildə sənədləşdirilməsini və gələcək nəsillərə obyektiv şəkildə çatdırılmasını tələb edir:
“Gəncə terrorundan altı il ötsə də, həmin qanlı hadisənin ağrısı və faciənin izləri xalqımızın yaddaşından silinməyib. Ermənistanın Azərbaycanın dinc şəhərinə raket zərbələri endirməsi nəticəsində mülki şəxslərin, o cümlədən uşaqların həyatını itirməsi və yaralanması bir daha göstərdi ki, 44 günlük Vətən müharibəsi dövründə Ermənistanın hədəfi yalnız hərbi obyektlər deyil, məhz dinc əhali və mülki infrastrukturlar da olub. Gəncə terroru Ermənistanın müharibə cinayətlərinin ən ağır nümunələrindən biri kimi tariximizə həkk olunub.
Bu hadisənin qurbanlarının xatirəsinin yaşadılması ilk növbədə tarixi həqiqətlərin sənədləşdirilməsini və gələcək nəsillərə obyektiv şəkildə çatdırılmasını tələb edir. Gəncədə həlak olan və yaralanan insanların hər birinin taleyi, dağıntıların miqyası, raket hücumlarının nəticələri foto, video, arxiv və şahid ifadələri ilə sistemləşdirilməli, bu materiallar vahid rəqəmsal arxivdə qorunmalıdır. Məktəblərdə, ali təhsil müəssisələrində, muzeylərdə və digər maarifləndirici platformalarda Gəncə terroruna dair xüsusi materialların hazırlanması da mühüm əhəmiyyət daşıyır.
Eyni zamanda, Gəncə terroru yalnız Azərbaycanın deyil, beynəlxalq ictimaiyyətin də yaddaşında qalmalı hadisədir. Buna görə də hadisə ilə bağlı faktların müxtəlif dillərdə sənədləşdirilməsi, beynəlxalq media, parlamentlər, hüquq müdafiə qurumları və elmi dairələrə çatdırılması davam etdirilməlidir. Ermənistanın dinc əhaliyə qarşı törətdiyi bu cinayətlərin unudulmaması həm ədalət, həm də gələcəkdə belə faciələrin təkrarlanmaması baxımından vacibdir.
Ən başlıcası isə biz bu faciəni yalnız keçmişin ağrılı səhifəsi kimi deyil, sülhün və təhlükəsizliyin dəyərini xatırladan tarixi dərs kimi gələcək nəsillərə ötürməliyik. Gəncə terrorunun qurbanlarının xatirəsini yaşatmaq, onların həyatını itirməsinə səbəb olan hadisələrin həqiqətini qorumaq və dünyaya çatdırmaq deməkdir. Tarixi yaddaş nə qədər güclü olarsa, gələcək nəsillərin ədalətli və sülhə əsaslanan bir dünyada yaşamaq imkanları bir o qədər möhkəm olar”.
Zeynəb Həsən
18:15 06.10.2026
Oxunuş sayı: 54
