Konqoda Ebola epidemiyası 4 minə yaxın insanın ölümünə səbəb olub
Konqoda Ebola virusuna qarşı yeni dərmanın sınaqlarına 250-dən çox insan cəlb olunub.
Crossmedia.az xəbər verir ki, “Associated Press” bu barədə dərmanın sınaqlarında iştirak edən şəxslər və həkimlərlə söhbətlərinə istinadən məlumat yayıb.
Söhbət sürətlə yayılan Ebola epidemiyasına səbəb olan Bundibugyo virusuna qarşı hazırlanan dərmandan gedir. Bu virus üçün hazırda təsdiqlənmiş vaksin və ya müalicə vasitəsi mövcud deyil.
Dərmanın klinik sınaqları iyul ayında başlayıb və epidemiyanın qarşısını almaq, ən azı onun yayılma tempini azaltmaq məqsədilə həyata keçirilən bir neçə tədqiqatdan biridir.
Sınaqlar epidemiyanın episentri olan Konqonun şərqindəki İturi əyalətində yerləşən tibb mərkəzində aparılır. İştirakçılar arasında xəstəliyə məruz qalmış şəxslərlə yanaşı, tibb işçiləri və xəstələrin yaxınları da var.
Məlumata görə, may ayının ortalarında elan edilən epidemiya başlayandan bəri Konqonun şərqində ən azı 8 300 təsdiqlənmiş Ebola hadisəsi qeydə alınıb. Onlardan 4 000-ə yaxını ölümlə nəticələnib.
Epidemiyanın artıq yeddi əyalətə yayıldığı bildirilir. Hakimiyyət orqanlarının məlumatına görə, xəstəliyin yayılma sürəti onun izlənilməsi və qarşısının alınması istiqamətində görülən tədbirləri üstələməkdə davam edir.
03:20 06.10.2026
Oxunuş sayı: 61
