Bir müəllim, minlərlə gələcək: Sinifdə başlayan böyük məsuliyyət
Azərbaycanda hər gün yüz minlərlə şagirdin qarşısında dayanan müəllim təkcə dərs proqramını izah edən şəxs deyil. 2025–2026-cı tədris ilində ölkənin ümumi təhsil müəssisələrində 130 mindən çox müəllim çalışıb, şagirdlərin sayı isə 1,6 milyondan çox olub. Bu rəqəmlərin arxasında isə milyonlarla dərs saatı, şagirdlərlə qurulan münasibətlər, verilən suallar, öyrədilən biliklər və bəzən də bir uşağın gələcək seçiminə təsir edən bir müəllim sözü dayanır. Yaxşı müəllimin təsiri dərs zəngi ilə bitmir. O, şagirdə yalnız düsturu, tarixi, ədəbiyyatı və ya bir qaydanı öyrətmir; necə düşünməyi, səhvdən nəticə çıxarmağı, doğru ilə yanlışı ayırmağı və məsuliyyət daşımağı da aşılayır. Bu gün informasiya əldə etməyin saniyələr çəkdiyi, texnologiyanın təhsil prosesinə sürətlə daxil olduğu bir dövrdə müəllimin əsas missiyalarından biri də şagirdə məlumatı əzbərlətməkdən çox, onu düzgün seçməyi və dəyərləndirməyi öyrətməkdir. Elə buna görə də müəllimlik yalnız bir peşə deyil, gələcək nəsli formalaşdıran böyük məsuliyyət kimi qiymətləndirilir".
Mövzu ilə bağlı Milli Məclisin deputatı Elnarə Akimova Crossmedia.az-a açıqlamasında bildirib ki, müəllim kitabdakı bilikləri şagirdə çatdırmaqla yanaşı, həm də uşağın həyata baxışını formalaşdıran, doğru ilə yanlışı ayırmağı, düşünməyi, sual verməyi və məsuliyyət daşımağı öyrədən şəxsdir:
"Bu gün isə müəllimin missiyası əvvəlkindən də böyükdür. Çünki müasir dünyada informasiya əldə etmək çətin deyil. Bir neçə saniyə ərzində istənilən məlumata çatmaq mümkündür. Əsas məsələ həmin məlumatın içindən doğru olanı seçmək, onu dəyərləndirmək və düzgün nəticə çıxarmaqdır. Burada müəllimin rolu əvəzsizdir. O, şagirdə hazır cavab verməkdən daha çox, düşünməyi öyrətməlidir. Müəllim sinifdə təkcə fənn tədris etmir. Onun davranışı, ədaləti, tələbkarlığı, dünyaya münasibəti də uşağın yaddaşında qalır. Bəzən müəllimin illərlə dediyi bir cümlə şagirdin həyatında bütöv bir istiqamətə çevrilir. Ona görə müəllimlik həm də böyük mənəvi məsuliyyətdir. Bu gün müəllimdən milli dəyərlərə bağlı, eyni zamanda dünyaya açıq düşünən, texnologiyadan istifadə edən, dəyişən dövrün çağırışlarını anlayan şəxsiyyət yetişdirmək tələb olunur. Bu isə müəllimin özünün də daim öyrənməsini, yenilənməsini zəruri edir. Məncə, müəllimin ən böyük uğuru verdiyi dərsin yadda qalması deyil, yetişdirdiyi insanın həyatda öz yolunu düzgün seçə bilməsidir. Çünki məktəbdə alınan bilik insanı savadlandıra bilər, amma müəllimin verdiyi istiqamət onu şəxsiyyətə çevirir. Müəllimə hörmət əslində gələcəyə hörmətdir. Çünki sabahın həkimi, mühəndisi, alimi, dövlət xadimi, ziyalısı bu gün müəllimin qarşısında əyləşən şagirddir. Bu baxımdan müəllimə verilən dəyər bir peşəyə deyil, cəmiyyətin gələcəyinə verilən dəyərdir".
Professor Cahangir Məmmədli isə açıqlamasında qeyd edib ki, müəllim o qədər təmiz, vicdanlı, qayğıkeş və namuslu olmalıdır ki, onun şagirdləri və tələbələri bilsinlər: bu müəllimdən təkcə bilik və elm deyil, həm də insanlıq, vətən sevgisi, insanlara və ətrafa qayğı, vətəndaşlıq qeyrəti öyrənmək olar. Bütün bunları ölkə rəhbərliyinin çıxışlarında da müəllimlərin qarşısında dayanan vəzifələr kimi qeyd etdiyini bildirən professor vurğulayıb ki, müəllim şagirdindən və tələbəsindən bilik və bacarıqdan başqa heç nə ummamalıdır. Professor vurğulayıb ki, xüsusilə orta məktəbdə müəllimin vicdanlı olması böyük əhəmiyyət daşıyır: bilik də, qayğı da, vətən sevgisi də məktəbdən başlayır. Bu baxımdan şagird və tələbələrin vətəndaşlıq ruhunda tərbiyə olunması müəllimin ən mühüm vəzifələrindən biridir.
Zeynəb Həsən
17:15 05.10.2026
Oxunuş sayı: 59
