Sibirdə taun: Rəsmi qurumlar epidemiyanı təkzib etdi
Rusiyanın İrkutsk vilayətində taun epidemiyası ilə bağlı yayılan məlumatlar əhali arasında narahatlıq yaradıb. Rəsmi qurumlar vəfat edən taun institutu əməkdaşına naməlum mənşəli pnevmoniya diaqnozu qoyulduğunu və bölgədə epidemioloji vəziyyətin sabit olduğunu açıqlayıb.
Crossmedia.az xəbər verir ki, “Meduza” bu barədə məlumat yayıb.
İrkutsk Taun Araşdırma İnstitutunun əməkdaşı Darya Şipilova oktyabrın 2-də Şelehov rayon xəstəxanasının reanimasiya şöbəsində vəfat edib. Onun taun törədicisi olan sınaq şüşəsini sındırdığı barədə məlumatlar yayılsa da, bu iddianın rəsmi təsdiqi yoxdur. Rospotrebnadzor institutda patogen mikroorqanizmlərlə iş zamanı qəza baş vermədiyini bildirib.
Hadisədən sonra təxminən 200 nəfərin tibbi nəzarətə götürüldüyü bildirilib. Rəsmi məlumata görə, təmasda olan şəxslərdə xəstəlik əlamətləri aşkarlanmayıb və laborator müayinələrin nəticələri mənfi olub.
Bununla yanaşı, İrkutskdakı bir neçə xəstəxanada karantin rejiminin tətbiq edildiyi və məhdudiyyətlərin üç həftə davam edə biləcəyi barədə məlumatlar yayılıb. Şelehovdakı “İrkutsk Alüminium Zavodu”nda da profilaktik məqsədlə maska rejimi tətbiq olunub.
Bölgə sakinləri isə qoruyucu geyimdə, maska və əlcəklərdə olan əməkdaşların küçələrdə göründüyünü, bəzi uşaq bağçalarında uşaqlara maska paylandığını bildiriblər.
16:27 05.10.2026
Oxunuş sayı: 51
