Egey dənizində gərginlik yenidən alovlandı: Türkiyə və Yunanıstan müharibəyə başlayır
Türkiyə ilə Yunanıstan arasında Egey dənizindəki adaların hərbiləşdirilməsi məsələsi yenidən gündəmə gəlib. Ankara Yunanıstanın bəzi adalardakı hərbi fəaliyyətinin beynəlxalq müqavilələrə zidd olduğunu bildirir, Afina isə bu iddiaları rədd edir. Tərəflərin qarşılıqlı açıqlamaları fonunda Egey dənizində təhlükəsizlik məsələsi və iki ölkə arasında uzun müddətdir davam edən fikir ayrılıqları yenidən diqqət mərkəzinə gəlib.
Crossmedia.az-a açıqlamasında politoloq İlqar Vəlizadə Egey dənizində Türkiyə və Yunanıstan arasında hərbi gərginliyin artmasına səbəb olan addımların davam etdiyini bildirib: “Bu proses, təəssüflər olsun ki, davamlı xarakter daşıyır. Bu, birinci insident deyil, təkrarlanan hadisələrdir. Bu hadisələr onu göstərir ki, təəssüflər olsun ki, Yunanıstan tərəfi Egey dənizində hərbi cəhətdən möhkəmlənmə cəhdlərini davam etdirir. Bu pozuculuq hərəkətləri regionda gərginliyin artmasına gətirib çıxarır. Təəssüflər olsun ki, beynəlxalq aləm buna biganə yanaşır və bu da öz növbəsində həm hərbi, həm də siyasi gərginliyin inkişafına gətirib çıxarır”.
İlqar Vəlizadə bildirib ki, Türkiyə Egey dənizindəki ərazilərin neytral qalmasını və azad gəmiçiliyə xidmət etməsini istəyir: “Türkiyə tərəfi israrlıdır ki, bu ərazilər neytral olmalıdır. Bu ərazilər, belə deyək, azad gəmiçiliyə xidmət etməlidir. Bu ərazilər əslində sülhə, barışa və əməkdaşlığa xidmət etməlidir. Çünki burada Türkiyə və Yunanıstan məhz Egey dənizində, bu adalarda birgə turizmi inkişaf etdirə bilər, azad iqtisadi zonalar tətbiq edə bilər. Bu yanaşma öz növbəsində sülhə və münasibətlərin normal və sivil qaydada qurulmasına xidmət göstərə bilər”.
Onun sözlərinə görə, tərəflər arasında yüksək səviyyədə dəfələrlə görüşlər keçirilsə də, əldə olunan razılaşmalar praktikada öz əksini tapmır: “Təəssüflər olsun ki, Yunanıstan tərəfi Türkiyənin bu çağırışlarını eşitmir. Baxmayaraq ki, dəfələrlə ən yüksək səviyyədə görüşlər keçirilib və bu problemlə bağlı həll yollarının tapılması müzakirə olunub. Müəyyən ortaq məxrəcə də gəliblər ki, bəli, gərginliyi azaltmaq lazımdır, gərginliyə səbəb olan addımların sayını və onların həcmini azaltmaq lazımdır. Amma əməldə biz bunu görmürük. Əməldə tam əks bir vəziyyət müşahidə olunur”.
Politoloq qeyd edib ki, tərəflərin hərbi infrastrukturunu gücləndirməsi qarşılıqlı addımlara və nəticə etibarilə gərginliyin artmasına səbəb ola bilər: “Ona görə də Türkiyənin başqa çıxış yolu qalmır ki, Egey dənizi sahillərində öz hərbi infrastrukturunu möhkəmləndirsin və öz maraqlarını qorusun. Əlbəttə ki, bu, öz növbəsində Yunanıstanın da buna uyğun addımlar atmasına səbəb olur və son nəticədə gərginlik artır. Təəssüflər olsun ki, hələ də bu məsələ ilə bağlı çıxış yolu tapılmayıb və yəqin ki, bu gərginlik davam edəcək. Sadəcə olaraq ümid etmək olar ki, hər iki tərəfin praqmatik yanaşması bu gərginliyin yeni münaqişə ocağına çevrilməsinə imkan verməyəcək”.
Nigar Xəlilli
18:30 25.09.2026
Oxunuş sayı: 40
