Zelenski: Ukrayna, Rusiya və ABŞ arasında Əbu-Dabi danışıqları səmərəli keçib
Ukrayna Prezidenti Volodimir Zelenski Əbu-Dabidə Ukrayna, Rusiya və ABŞ arasında keçirilən üçtərəfli danışıqları konstruktiv və məzmunlu qiymətləndirib.
Crossmedia.az xəbər verir ki, bu barədə “Anadolu” agentliyi məlumat yayıb.
Zelenski “X” sosial şəbəkəsindəki paylaşımında tərəflərin Ukrayna üçün təhlükəsizlik zəmanətlərini, onların uzunmüddətli effektivliyini təmin edəcək mexanizmləri müzakirə etdiklərini bildirib.
Onun sözlərinə görə, müharibənin yenidən başlamasının qarşısını almaq üçün real mexanizmlərə ehtiyac var. Danışıqlarda gərginliyin azaldılması istiqamətində addımlar və mümkün humanitar tədbirlər də müzakirə olunub. Zelenskiy əsirlərin azad edilməsinin prioritet olaraq qaldığını vurğulayıb.
Ukrayna lideri nümayəndə heyətinə həm çərşənbə günü üçtərəfli formatda, həm də növbəti günlərdə daha geniş tərkibdə aparılacaq müzakirələr üçün konkret tapşırıqlar verdiyini qeyd edib. Geniş tərkibli danışıqlarda ABŞ Prezidenti Donald Trampın nümayəndələri və Avropa təmsilçiləri də iştirak edəcəklər.
Zelenski danışıqların təşkilinə görə ABŞ-yə, görüşlərə ev sahibliyi etdiyinə görə isə Birləşmiş Ərəb Əmirliklərinə təşəkkür edib.
Qeyd edək ki, Əbu-Dabidə Moskva, Kiyev və Vaşinqton nümayəndə heyətləri arasında danışıqlar təxminən dörd saat yarım davam edib. Rusiya nümayəndə heyətinə Vladimir Medinski, Ukrayna nümayəndə heyətinə isə Xarici Kəşfiyyat Xidmətinin rəhbəri Rustem Umerov başçılıq edib. Bu, fevral ayında İsveçrənin Cenevrə şəhərində keçirilən görüşlərdən sonra ilk üçtərəfli danışıqlar olub.
22:27 10.11.2026
Oxunuş sayı: 38
