Lavrov: “Avropanın Ukraynada atəşkəs tələbi ilə razılaşmayacağıq”
Rusiya xarici işlər naziri Sergey Lavrov Avropa ölkələrinin Ukraynada atəşkəs elan edilməsi ilə bağlı tələbini qəbul etməyəcəklərini bildirib. O, bu təklifin Ukraynaya vaxt qazanmaq və itkilərini bərpa etmək imkanı yaratmaq məqsədi daşıdığını iddia edib.
Crossmedia.az xəbər verir ki, bu barədə “Anadolu” agentliyi məlumat yayıb.
Lavrov Moskvada Kollektiv Təhlükəsizlik Müqaviləsi Təşkilatının (KTMT) xarici işlər, müdafiə və təhlükəsizlik şuraları katibləri komitəsinin birgə iclasında iştirak edib. Görüşdən sonra KTMT-nin baş katibi Taalatbek Masadıkovla birgə mətbuat konfransı keçirib.
Birləşmiş Ərəb Əmirliklərinin paytaxtı Əbu-Dabidə Rusiya, ABŞ və Ukrayna arasında üçtərəfli danışıqların başladığını xatırladan Lavrov bildirib ki, müzakirələrdə ABŞ-nin təşəbbüsü ilə gələcək regional təhlükəsizlik sisteminin yaradılması məsələləri nəzərdən keçirilir.
Onun sözlərinə görə, əvvəlcə gələcək təhlükəsizlik sisteminin dəqiq parametrlərinin müəyyənləşdirilməsi, daha sonra isə Rusiya ilə Ukrayna arasındakı münaqişənin həllinə keçilməsi məntiqli yanaşmadır.
Lavrov Avropa nümayəndələrinin də danışıqlar üçün Əbu-Dabiyə gəldiyini qeyd edib. O bildirib ki, ABŞ tərəfi Rusiya nümayəndə heyəti ilə görüşdən əvvəl ukraynalı və avropalılarla danışıqlar aparacağını açıqlayıb. Nazir bu üsulun səmərəli olduğunu düşünmədiyini, lakin ABŞ-nin istədiyi şəxslərlə görüşməsinə mane olmaq niyyətində olmadıqlarını söyləyib.
Rusiya xarici işlər naziri Avropa ölkələrinin atəşkəsdən dərhal sonra Ukraynaya hərbi qüvvələr yerləşdirməyi planlaşdırdığını da iddia edib. O, bəzi Avropa İttifaqı ölkələrinin Polşada hərbi təlimlərə başladığını diqqətə çatdırıb.
Lavrov Ukrayna hakimiyyətinin 2014-cü ildən imzalanan kollektiv təhlükəsizlik sazişlərini həyata keçirməkdən imtina etdiyini və münaqişənin başlamasını bununla əlaqələndirib.
İran və İsrail məsələsinə də toxunan Lavrov ABŞ-nin İrana yenidən hücum etməyəcəyinə ümid etdiyini bildirib. O, Qətər, Pakistan və Misirin vasitəçilik təşəbbüslərini dəstəklədiklərini və regiondakı problemlərin siyasi yolla həllinin tərəfdarı olduqlarını qeyd edib.
Nazir Ermənistanın KTMT və Avrasiya İqtisadi İttifaqından (Aİİ) çıxmaq üçün rəsmi müraciət etmədiyini də bildirib. Onun sözlərinə görə, Ermənistanın KTMT-də səsvermə hüququnun dayandırılması məsələsinin dövlət başçılarının müzakirəsinə çıxarılması barədə qərar qəbul edilib. Lavrov Ermənistanı təşkilatdan çıxarmaq niyyətində olmadıqlarını vurğulayıb.
23:12 10.11.2026
Oxunuş sayı: 28
