GTA 6 sızıntısına "Rockstar"dan ilk açıqlama
"Grand Theft Auto 6"nın (GTA 6) hazırlanmasına cavabdeh olan "Rockstar Games" oyuna aid olduğu bildirilən görüntülərin internetə sızdırılmasından sonra ilk dəfə açıqlama verib.
Crossmedia.az xəbər verir ki, bu barədə "BBC" məlumat yayıb. Şirkət ötən həftə sosial şəbəkələrdə yayılmağa başlayan oyun görüntülərinin yaradıcı heyət üçün "ürək ağrıdan" olduğunu bildirib və pərəstişkarların oyunu bu şəkildə görməsinin nəzərdə tutulmadığını vurğulayıb.
"Rockstar Games" uzun müddətdir oyunun rəsmi yeniliklərini gözləyən istifadəçilərdən gecikmələrə görə üzr istəyib. Şirkət həmçinin bu həftə "Netflix" platformasında yayımlanacaq xüsusi önizləmə ilə pərəstişkarların gözləntilərini üstələyəcəyinə söz verib.
İlk görüntülər yayılanda onların həqiqi olub-olmadığı şübhə doğursa da, sonrakı günlərdə materialların oyuna aid olduğunu göstərən sübutlar artıb. Sosial şəbəkələrdə yayılan videolar müəllif hüquqları pozuntusu əsasında silinib.
Bundan əlavə, "Rockstar Games"in ana şirkəti "Take-Two Interactive" sızıntılarla bağlı Nyu-York məhkəməsində hüquqi proses başladıb.
Şirkət bildirib ki, sızdırılan görüntülər oyundakı bəzi sürprizləri əvvəlcədən üzə çıxardığı üçün oyun təcrübəsinə təsir göstərə bilər. "Rockstar Games" son günlərdə dəstək mesajları göndərən pərəstişkarlarına da təşəkkür edib.
Sızıntıların arxasında olduğunu iddia edən qrup isə bunu oyunçuların maraqlarını qorumaq məqsədilə etdiyini bildirir. Qrup "Rockstar Games"in oyunun buraxılışı zamanı disk versiyasını təqdim etməməsi kimi qərarlarını tənqid edib. Bununla belə, sızdırılan materialları paylaşan şəxslərin izləyicilərdən kriptovalyuta şəklində ianə istəməsi də diqqət çəkib.
"GTA 6"nın noyabr ayında "PlayStation 5" və "Xbox" konsollarında satışa çıxması gözlənilir. "BBC" oyunun bu onilliyin ən böyük videooyun buraxılışlarından biri olacağını qeyd edib. Seriyanın əvvəlki oyunu "GTA 5" isə 2013-cü ildə satışa çıxıb və indiyədək 200 milyondan çox nüsxə satıb.
02:22 27.08.2026
Oxunuş sayı: 46
