Müsəlman məktəbinin sökülməsi ETİRAZLARA səbəb oldu
Hindistanın Uttar-Pradeş ştatında onilliklərdir fəaliyyət göstərən müsəlman məktəbinin böyük hissəsinin sökülməsi etirazlara və ayrı-seçkilik ittihamlarına səbəb olub.
Crossmedia.az xəbər verir ki, "Muslim Network TV" bu barədə məlumat yayıb.
Siddhartnagar rayonunda yerləşən “Ərəb Ziya-ül-Ulum” mədrəsəsinin 7 sinif otağı, bir mağazası və əsas zalının bir hissəsi buldozerlərlə sökülüb. Yerli hakimiyyət məktəbin dövlət torpaqları hesabına genişləndirildiyini bildirib.
Rəsmi məlumata görə, 1967-ci ildən fəaliyyət göstərən mədrəsədə təxminən 400 uşaq təhsil alıb. Təxminən 14 min kvadrat fut sahəsi olan təhsil müəssisəsinin yarıdan çoxunun iki saata yaxın müddətdə söküldüyü bildirilib.
Mədrəsənin rəhbəri Əbdül Salam qərardan şikayət versə də, məhkəmə avqustun 14-də apellyasiyanı rədd edib.
Hadisə siyasi etirazlara da səbəb olub. Müxalifətdəki “Samacvadi” Partiyasının deputatı Səyyidə Xatun fəallarla birlikdə hadisə yerinə gələrək söküntünün dayandırılmasını tələb edib. Polis mədrəsə ətrafına təxminən 100 əməkdaş cəlb edib və etirazçıların əraziyə yaxınlaşmasının qarşısını almaq üçün barrikadalar qurub.
“Aam Aadmi” Partiyasının Uttar-Pradeş bölməsi söküntünü “konstitusiyaya zidd” adlandırıb. “Hindistan Milli Konqresi”nin lideri Caved Əşrəf Xan isə hadisəni müsəlmanlara qarşı “açıq nifrət proqramı” kimi qiymətləndirib.
Ştat hakimiyyəti isə mədrəsənin ilkin olaraq şəxsi torpaq sahəsində tikildiyini, sonradan isə ona bitişik dövlət ərazisi hesabına genişləndirildiyini bildirir.
14:15 21.08.2026
Oxunuş sayı: 45
