Polşa Ukraynaya silah tədarükü ilə bağlı məlumatları açıqlayacaq
Polşanın Ukraynaya hərbi yardım tədarükləri ilə bağlı məlumatlar açıqlanacaq.
Crossmedia.az xəbər verir ki, Polşanın müdafiə naziri Vladislav Kosinyak-Kamış bu barədə X sosial şəbəkəsində paylaşım edib.
Nazirin sözlərinə görə, qərar Baş nazir Donald Tuskla məsləhətləşmələrdən sonra qəbul edilib. O bildirib ki, bu addım cəmiyyət qarşısında məsuliyyət prinsipi və qüvvədə olan qanunvericiliyə uyğun olaraq atılıb.
Kosinyak-Kamış qeyd edib ki, 2022–2026-cı illər ərzində Ukraynaya göstərilən bütün hərbi yardım tranşları barədə məlumat ictimaiyyətə açıqlanacaq.
Müdafiə naziri əlavə edib ki, eyni zamanda Hərbi Əks-Kəşfiyyat Xidmətinə bu tədarüklərlə bağlı "məxfi məlumatları" yayan şəxslərin araşdırılması tapşırılıb.
Qeyd edək ki, bundan əvvəl Polşa Seyminin vitse-spikeri Kşiştof Bosak hökumətin ötən yaz parlamenti məlumatlandırmadan Ukraynaya "Patriot" hava hücumundan müdafiə sistemləri üçün raketlər göndərdiyini və ABŞ istehsalı olan bu raketlərin alınması növbəsini Kiyevin xeyrinə güzəştə getdiyini iddia etmişdi.
20:41 05.07.2026
Oxunuş sayı: 51
