Xarici xəbərlər
İrandan ABŞ-yə mesaj: Müharibənin hərbi həlli yoxdur"
İranın xarici işlər naziri Abbas Əraqçi ABŞ-lə münaqişənin hərbi yolla həllinin mümkün olmadığını bildirərək ədalət və bərabərlik prinsiplərinə əsaslanan danışıqlara çağırıb.
Crossmedia.az xəbər verir ki, “NDTV” bu barədə məlumat yayıb.
Əraqçi xarici ölkələrin səfirləri ilə görüşündə bildirib ki, İran diplomatik həllin tərəfdarıdır. Bununla belə, o, ölkəsinə qarşı yeni hərbi əməliyyatlar başlayacağı təqdirdə Tehranın daha güclü cavab verəcəyini deyib.
“Yeni sanksiyalara əsaslanan həll də yoxdur. Münaqişəni yalnız ədalət və bərabərlik prinsiplərinə söykənən danışıqlar başa çatdıra bilər”, – deyə nazir vurğulayıb.
ABŞ və İran rəsmiləri ötən həftə BMT Baş Assambleyasının iclasları çərçivəsində dolayı danışıqlar aparıblar. Tehran Hörmüz boğazının yenidən açılması üçün yeddi şərt irəli sürdüyünü açıqlayıb. Tələblər arasında Yaxın Şərqdə atəşkəsin təmin edilməsi, xaricdəki İran aktivlərinin dondurulmasının aradan qaldırılması, neft sektoruna tətbiq olunan sanksiyaların ləğvi və ABŞ-ın dəniz blokadasına son qoyulması yer alır.
Danışıqlarda əsas fikir ayrılığı Hörmüz boğazının açılması və qarşılıqlı məhdudiyyətlərin aradan qaldırılması ilə bağlıdır. ABŞ Prezidenti Donald Tramp İranın təklifini rədd etsə də, yeni danışıqlar imkanını tam istisna etməyib.
19:30 04.10.2026
Oxunuş sayı: 54
