Yağışa meydan oxuyan insan qüllələri: Kataloniyada rəngli festival
İspaniyanın Kataloniya bölgəsində 1932-ci ildən keçirilən “İnsan Qüllələri” festivalı əlverişsiz hava şəraitinə baxmayaraq rəngarəng görüntülərlə yadda qalıb.
Crossmedia.az xəbər verir ki, kökləri XIX əsrə dayanan “Castells” ənənəsində iştirakçılar bir-birinin çiyinlərinə söykənərək insan qüllələri yaradırlar. Qüllənin aşağı hissəsində çoxsaylı iştirakçılar dayanır, daha sonra insanlar 2 və ya 3 nəfərlik qruplar şəklində bir-birinin üzərinə çıxaraq quruluşu tamamlayırlar.
Bölgə sakinləri üçün böyük əhəmiyyət daşıyan festivalda müxtəlif qruplar ən yüksək və uğurlu insan qülləsini qurmaq üçün yarışırlar. Festival direktoru Ester Roca tədbiri 4 855 nəfərlik salonda izləmək üçün 65 mindən çox müraciət daxil olduğunu bildirib.
Festivalda 4 yaşdan 60 yaşadək iştirakçılar yer alıb. Uzun illərdir “Castells” tədbirlərinə qatılan Xavier Llenas Grimau bu ənənənin onlar üçün həyat tərzinə çevrildiyini deyərək, insan qüllələrinin qurulmasının ciddi hazırlıq, məşq, yüksək diqqət və komanda həmrəyliyi tələb etdiyini vurğulayıb.
Digər tərəfdən, Kataloniya bölgəsində hökm sürən güclü yağışlar festivalın proqramına da təsir edib. “Qırmızı” xəbərdarlıq elan edilən ərazidə təhlükəsizlik tədbirləri çərçivəsində oktyabrın 4-də keçirilməsi planlaşdırılan yarışın əsas mərhələsinin səhər əvəzinə günortadan sonra başlanmasına qərar verilib.
00:32 05.10.2026
Oxunuş sayı: 57
