Hörmüz boğazından keçid pullu olur?
İran Çin və digər dost ölkələr üçün Hörmüz boğazından keçən gəmilərə güzəştli tranzit tarifləri tətbiq etməyi planlaşdırır.
Crossmedia.az xəbər verir ki, bu barədə İranın Çindəki səfiri Əbdolreza Rəhmani Fəzli Dünya Sülh Forumu çərçivəsində çıxışı zamanı bildirib.
Diplomatın sözlərinə görə, gəmilərin təhlükəsizliyinin təmin edilməsi və ekoloji nəzarət üçün tutulacaq rüsumlar İran və Oman tərəfindən birgə hazırlanan yeni dəniz qaydalarının tərkib hissəsi olacaq. O qeyd edib ki, bu addım İranın ABŞ və İsraillə dörd ay davam edən qarşıdurmasından sonra milli təhlükəsizlik məsələləri ilə əsaslandırılır.
Məsələ beynəlxalq müstəvidə mübahisələrə səbəb olub. ABŞ və Fars körfəzi ölkələri İran və Omanın bu cür rüsumlar müəyyən etmək hüququnu mübahisələndirirlər. Avropa diplomatları isə dövlət mənsubiyyətindən asılı olmayaraq bütün gəmilər üçün vahid tariflərin tətbiq edilməsinin tərəfdarı olduqlarını bildirirlər.
Məlumata görə, bölgədə vəziyyət hələ də gərgin olaraq qalır. Müvəqqəti razılaşma çərçivəsində kommersiya gəmiçiliyi bərpa olunsa da, baş verən insidentlər bəzi tanker marşrutlarının dəyişdirilməsinə səbəb olur. İran neftinin əsas alıcısı olan Çin isə enerji təhlükəsizliyi risklərini azaltmağa və regionda diplomatik mövqeyini gücləndirməyə çalışır.
01:17 05.07.2026
Oxunuş sayı: 56
