Azərbaycan Milli Xalça Muzeyində “Bir mədəniyyət xəzinəsi: Divanü lüğat-it-türk” sərgisi açılıb
Azərbaycan Milli Xalça Muzeyində Birinci Türkoloji Qurultayın 100 illiyinə həsr olunan “Türk Dünyası Həftəsi” çərçivəsində “Bir mədəniyyət xəzinəsi: Divanü lüğat-it-türk” sərgisinin açılış mərasimi keçirilib. Sərgi türk dünyasının ortaq dil, mədəniyyət və tarixi yaddaş nümunələrindən biri olan “Divanü lüğat-it-türk” əsərinin müasir bədii interpretasiyasını təqdim edir, ziyarətçilərə bu qiymətli irsin müxtəlif sənət nümunələri vasitəsilə tanıdılması imkanını yaradır.
Crossmedia.az xəbər verir ki, tədbirdə Alyona Əliyeva da iştirak edib.
Tədbirdə, həmçinin Azərbaycan Milli Xalça Muzeyinin direktoru Əminə Məlikova, Mədəniyyət nazirinin müşaviri Cahangir Səlimxanov, Yunus Əmrə İnstitutunun Azərbaycan üzrə koordinatoru Gökhan Seyhan, Türk Dil Qurumunun keçmiş sədri professor Şükrü Haluk Akalın, Türkiyə Respublikası Milli Təhsil Nazirliyinin Həyatboyu Öyrənmə Baş İdarəsinin layihə üzrə mütəxəssisi Dilay Nakış, Milli Məclisin deputatı Hikmət Babaoğlu və digər qonaqlar iştirak ediblər.
Çıxış edən Əminə Məlikova sərginin “Divanü lüğat-it-türk” əsərinin daşıdığı zəngin mənəvi və mədəni dəyərlərin yeni baxış bucağından təqdim olunmasına imkan yaratdığını bildirib. O qeyd edib ki, ekspozisiya sözün min ildən artıq bir dövrdə dəyərə, dəyərin əmələ, əməlin isə mədəni davamlılığa çevrilməsi prosesini izləməyə şərait yaradır.
“Türkiyə Milli Təhsil Nazirliyinin Həyatboyu Öyrənmə Baş İdarəsinin tabeliyində fəaliyyət göstərən Olğunlaşma İnstitutları tərəfindən hazırlanan sərgi türk mədəniyyətinin ən mühüm yazılı irs nümunələrindən biri hesab olunan "Divanü lüğat-it-türk" əsərinin müasir bədii interpretasiyasını təqdim edir”, - deyə Əminə Məlikova qeyd edib.
Dilin daim inkişaf edən canlı sistem olduğunu vurğulayan Mədəniyyət nazirinin müşaviri Cahangir Səlimxanov Azərbaycan dilinin də müasir türk dilləri ilə qarşılıqlı əlaqə nəticəsində zənginləşdiyini bildirib.
“Divanü lüğat-it-türk” türk dillərinin zənginliyini əks etdirən ən qiymətli mənbələrdən biridir”, - deyə Cahangir Səlimxanov qeyd edib.
Yunus Əmrə İnstitutunun Azərbaycan üzrə koordinatoru Gökhan Seyhan sərginin ortaq türk mədəni irsinin nümayişi baxımından mühüm əhəmiyyət daşıdığını bildirib. O, tədbirin məhz Milli Xalça Muzeyində keçirilməsini xüsusi dəyər kimi qiymətləndirib.
Sərgidə təqdim olunan sənət nümunələrinin türk xalqlarının tarixi-mədəni yaddaşını əks etdirdiyini vurğulayan professor Şükrü Haluk Akalın nümayiş olunan eksponatların məzmunundan danışıb.
“Toxuculuq, tikmə, keramika, ağac və metal işləmə sənətlərinə aid nümunələr Qaraxanlılar dövrünün memarlıq motivləri əsasında müasir bədii üslubda yenidən işlənib. Sərgidə, həmçinin yazı mədəniyyətini əks etdirən mürəkkəb qabları, kitab cildləri, eləcə də miniatür sənəti vasitəsilə canlandırılmış uşaq oyunları, toy mərasimləri, döyüş və ziyafət səhnələri nümayiş etdirilir. Bu eksponatlar türk xalqlarının tarixi-mədəni yaddaşını, ortaq dəyərlərini və sosial həyatını bədii ifadə vasitələri ilə ziyarətçilərə çatdırır”, - deyə Şükrü Haluk Akalın əlavə edib.
Türkiyə Respublikası Milli Təhsil Nazirliyinin Həyatboyu Öyrənmə Baş İdarəsinin layihə üzrə mütəxəssisi Dilay Nakış Azərbaycanda keçirilən bu layihədə iştirak etməkdən qürur duyduqlarını bildirib.
Milli Məclisin deputatı Hikmət Babaoğlu isə “Divanü lüğat-it-türk” əsərinin türk dünyasının ortaq dil və mədəniyyət xəzinəsi olduğunu vurğulayıb.
Tədbir bədii hissə ilə davam edib. Azərbaycan Milli Konservatoriyasının aşıqlar dəstəsi musiqi nömrəsi ilə çıxış edib.
Daha sonra qonaqlar sərgi ilə tanış olublar.
Sərgi iyulun 13-dək davam edəcək.
Nigar Xəlilli
09:30 01.07.2026
Oxunuş sayı: 55
