Yaxın Şərqdəki problemlərin çoxunun İsraildən qaynaqlandığını deyə bilərik - Politoloq
ABŞ-ın Suriyada yeni hərbi mövcudluq planları regionda siyasi və təhlükəsizlik balansına dair yeni müzakirələrə səbəb olub. Məlumata görə, Vaşinqton Dəməşq yaxınlığındakı hava bazasında hərbi infrastruktur yaratmağa hazırlaşır. Bu addımın məqsədi ABŞ-ın vasitəçiliyi ilə Suriya və İsrail arasında formalaşdırılması planlaşdırılan təhlükəsizlik paktının icrasını təmin etməkdir. Mənbələr bildirir ki, layihə bölgədə sabitliyin qorunması və potensial toqquşmaların qarşısının alınması üçün nəzərdə tutulub. Bununla belə, analitiklər hesab edirlər ki, ABŞ-ın bu qərarı regiondakı digər oyunçular, xüsusilə İran və Rusiya tərəfindən narazılıqla qarşılanacaq.
Mövzu ilə bağlı Ədalət, Hüquq, Demokratiya (ƏHD) Partiyası İdarə Heyətinin üzvü, siyasi şərhçi Əli Zülfüqaroğlu Crossmedia.az-a açıqlama verib: “Amerika Birləşmiş Ştatları Suriya və Yaxın Şərq siyasətini Türkiyə ilə koordinasiyalı şəkildə həyata keçirməyə çalışır. Təbii ki, Yaxın Şərqdə sabitliyin bərpası ilə bağlı Birləşmiş Ştatlar Türkiyə üzərindən daha çox siyasət yürütməyə çalışır. Birləşmiş Ştatların Suriyada hərbi mövcudluğunu saxlaması da maraqlı görünür, amma təbii ki, daha çox Türkiyənin varlığı bölgədə sabitliyin bərpasını və dayanıqlı olmasını şərtləndirir. İsrailin təhlükəsizliyi deyildikdə, ilk növbədə İsrail hökumətinin yürütdüyü siyasətə nəzər salmalıyıq. Yəni, İsrailin təhlükəsizliyi ilk növbədə İsraildən asılıdır. İndiyə qədər Yaxın Şərqdə baş verən hərbi toqquşmalara və gərginliklərə nəzər salsaq, o zaman problemlərin daha çox İsraildən qaynaqlandığını deyə bilərik. Hazırda Birləşmiş Ştatlarla İsrail arasında həm Suriya, həm Qəzza, həm də İranla bağlı məsələlərdə ciddi ziddiyyətlər var”.
Ekspert bildirib ki, istər Birləşmiş Ştatlarla İsrail arasında ziddiyyətlərin aradan qaldırılması, istər Yaxın Şərqdə sabitliyin hökm sürməsi, istərsə də Türkiyə–İsrail münasibətlərinin düzəlməsi, eyni zamanda ərəb ölkələri ilə İsrail arasında problemlərin aradan qaldırılmasının başlıca yolu təbii ki, İsrail hökumətindən asılıdır: “Hesab edirəm, nə qədər ki, İsrail hökuməti xarici siyasətini sionizmə dayanaraq yürüdəcək, o zaman İsrail ilə Suriya, yaxud İsrail ilə Fələstin, ümumiyyətlə, Yaxın Şərqdə heç bir zaman sülh əldə oluna bilməz. Təbii ki, Birləşmiş Ştatların Suriyada hərbi bazasının mövcudluğu da İsrailin təhlükəsizliyi baxımından heç bir əhəmiyyət daşımır. Ona görə ki, İsrailin indiyə qədər Yaxın Şərq ölkələri ilə bağlı yürütdüyü siyasət və eyni zamanda hərbi zərbələr endirməsi, onun cavabsız qalması təbii ki, Birləşmiş Ştatlara görədir. Yəni, Birləşmiş Ştatlarla problemlər yaranmasını istəməyən dövlətlər İsrailin bütün hücumlarına göz yumublar. Bu baxımdan hesab edirəm ki, Yaxın Şərqdə sabitliyin və İsrailin təhlükəsizliyinin təminatının yeganə yolu İsrail hökumətinin yürütdüyü siyasətdən asılıdır”.
Zeynəb Xuduyeva
17:25 06.11.2025
Oxunuş sayı: 1784
