Avropa
Elmar Məmmədyarov: Avropadakı iğtişaşlarda xarici qüvvələrin əli var
Albaniyanın paytaxtı Tiranada hökumət əleyhinə keçirilən etiraz aksiyaları şiddətli iğtişaşlar və dövlət binalarının darmadağın edilməsi ilə nəticələnib. Oktyabrın 13-də Təhsil Nazirliyinin binası qarşısında tələbələrin aksiyası ilə başlayan nümayişlər gərginliyi daha da artırıb. Baş nazir Edi Ramanın istefasını tələb edən nümayişçilər hökumət başçısının iqamətgahına soxulmağa cəhd göstəriblər. Polisin müdaxiləsindən sonra qruplara bölünən etirazçılar İqtisadiyyat Nazirliyinin binasına daxil olaraq xidməti otaqları, mebel və avadanlıqları darmadağın ediblər. İğtişaşlar zamanı Mərkəzi Seçki Komissiyasına, parlamentə, Ədliyyə Nazirliyinə və Dövlət Arxivinə ciddi ziyan dəyib. Ümumiyyətlə son günlər Avropada baş verən iğtişaşlar diqqət mərkəzindədir. Fransanın paytaxtında da tələbə etirazları bütün şəhəri bürüyüb. Avropada baş verən bu iğtişaşlar bir-birindənmi qaynaqlanır yoxsa xarici təsirlərmi idarə edir?
Mövzu ilə bağlı Crossmedia.az-a açıqlama verən sabiq Xarici işlər naziri Elmar Məmmədyarov bildirib ki, bu cür kütləvi etirazların və yaranan gərginliyin arxasında əsasən iki fərqli səbəb dayanır:
"Baş verən proseslərin və yaranan gərginliyin arxasında əsasən iki fərqli səbəb dayanır:
Birincisi, sosial-iqtisadi və ictimai problemlərdir. Cəmiyyətdə yaranan müəyyən narazılıqlar, həyat səviyyəsinin aşağı düşməsi, sosial bərabərsizlik və ya digər daxili çətinliklər zamanla kütləvi etirazların formalaşmasına və narazılıq dalğasının genişlənməsinə səbəb olur.
İkincisi isə xarici amillər və kənar müdaxilə ehtimalıdır. Çox güman ki, bu cür proseslər sadəcə daxili səbəblərlə məhdudlaşmır; kənardan təsir göstərən bəzi qüvvələr tərəfindən idarə olunur və ölkənin daxili işlərinə birbaşa qarışmaq cəhdləri kimi özünü büruzə verir."
Nigar Xəlilli
19:30 16.10.2026
Oxunuş sayı: 62
