ABŞ-nin ikinci adamı İsrailə gedir: Yaxın Şərqdə nə baş verir?
ABŞ-nin vitse-prezidenti Cey Di Vensin planlaşdırılan səfəri Yaxın Şərqdə baş verən son hadisələr fonunda diqqət mərkəzinə çevrilib. İsrail Hava Limanları İdarəsinin məlumatına əsasən, Təl-Əvivdəki Ben-Qurion hava limanında onun gəlişinə hazırlıqlar görülür. Lakin hələlik nə Ağ Ev, nə də İsrailin Baş nazirinin ofisi səfəri rəsmi şəkildə təsdiqləməyib. Bu səfərin əsas məqsədinin Qəzzada atəşkəsin növbəti mərhələsi, girovların azad olunması və regionda gərginliyin azaldılması istiqamətində müzakirələrin aparılması olduğu ehtimal edilir.
Cey Di Vensin İsrailə səfəri barədə politoloq Aytən Qurbanova Crossmedia.az-a danışıb.
Onun sözlərinə görə, Qəzzada atəşkəsin şərtlərinin mərhələli şəkildə həyata keçirilməsi bu kimi danışıqları qaçınılmaz edir: "Belə səfərlər yaxud səfər baş tutmasa belə, onunla bağlı müzakirələr əsasən Qəzza və Suriya məsələləri, eləcə də Şarm əl-Şeyx görüşü zamanı Həmas və İsrail arasında əldə olunmuş razılaşmaların icrası ilə bağlıdır. Girovların azad edilməsi məsələsi ilkin mərhələdə həyata keçirilmişdi. İndi isə növbəti mərhələdə tərəflər arasında digər razılaşmaların hansı şərtlərlə və hansı mərhələdə yerinə yetiriləcəyi əsas müzakirə mövzusu olacaq.Bununla yanaşı, belə bir səfərin gündəmdə olması onu da göstərir ki, tərəflər arasında hələ tam razılaşdırılmamış məqamlar qalmaqdadır. Ən azı artıq əldə olunmuş razılaşmaların icrasının detalları və həyata keçirilmə mexanizmləri ilə bağlı fikir ayrılıqlarının mövcud olduğu ehtimal edilir".
Fidan Qarayeva
11:54 21.10.2025
Oxunuş sayı: 15403
