"Başı bəlalı" Qəzza: Sülh asanlıqla əldə olunmayacaq
Yaxın Şərqdə davam edən gərgin vəziyyət fonunda ABŞ Prezidenti Donald Trampın son bəyanatı beynəlxalq ictimaiyyətin diqqət mərkəzinə çevrilib. Dövlət başçısı CNN telekanalına verdiyi müsahibə zamanı bildirib ki, əgər Fələstinin HƏMAS hərəkatı atəşkəs razılaşmasının şərtlərinə əməl etməzsə, İsrailə Qəzza zolağında hərbi əməliyyatları bərpa etməyə icazə veriləcək. Trampın sözlərinə görə, onun əldə etdiyi məlumatlar HƏMAS-ın razılaşmanın əsas tələblərindən biri olan girovların həm diri, həm də həlak olmuş şəxslərin qaytarılması öhdəliyini yerinə yetirmədiyini göstərir.
ABŞ prezidentinin bu açıqlaması, xüsusilə də onun “mən bu sözü deyən kimi İsrail Qəzza küçələrinə qayıda bilər” ifadəsi regionda vəziyyətin yenidən gərginləşə biləcəyi ilə bağlı narahatlıqları artırıb. Xatırladaq ki, Trampın təqdim etdiyi 20 bəndlik sülh planının dördüncü bəndinə əsasən, bütün girovların İsrail tərəfinin razılaşmanı qəbul etməsindən sonra 72 saat ərzində azad olunması nəzərdə tutulur.
Hazırkı vəziyyət bir daha göstərir ki, Yaxın Şərqdə sülh prosesi son dərəcə həssas və mürəkkəb xarakter daşıyır. Atəşkəs razılaşmalarının pozulması, qarşılıqlı etimadsızlıq və tərəflər arasında uzun illərdir davam edən siyasi qarşıdurma regionda sabitliyin bərqərar olmasını çətinləşdirir. Trampın bəyanatı həm də ABŞ-ın yeni administrasiyasının Yaxın Şərq siyasətində sərt mövqeyini nümayiş etdirən növbəti addım kimi dəyərləndirilir.
Məsələ ilə bağlı politoloq Aytən Qurbanova Crossmedia.az-a danışıb: "Atəşkəsin şərtləri ilə bağlı bütün müddəaların həm HƏMAS, həm də digər regional dövlətlər tərəfindən birmənalı şəkildə qəbul olunacağına dair ciddi şübhələr artıq ilk gündən səsləndirilirdi. Düzdür, Şarm əl - Şeyx şəhərində keçirilən Sülh Samiti çərçivəsində kifayət qədər önəmli sülh mesajları verildi. Lakin Yaxın Şərq onsuz da münaqişələrlə zəngin bir regiondur və Qəzzada baş verən son hadisələr sülhün əldə olunmasının asan olmayacağı ehtimallarını daha da gücləndirir".
O, həmçinin atəşkəsin şərtlərinin yerinə yetirilməsi ilə bağlı ciddi şübhələrin olduğu belə bir məqamda Trampın səsləndirdiyi fikirlər müəyyən qədər xəbərdarlıq xarakteri daşıdığını bildirib: "Yəni, əgər bu şərtlərdən kənar addım atılarsa, İsrailin hərbi əməliyyatları yenidən başlaya bilər".
Elmir Heydərli
12:33 16.10.2025
Oxunuş sayı: 2984
