Rusiya vasitəsilə İsrail və İran arasında gərginliyin yumşaldılması diplomatik siqnal kimi qiymətləndirilir-Politoloq
Yaxın Şərqdə son günlərdə baş verən hadisələr, xüsusilə İsrail və İran arasında gərginliyin artması beynəlxalq ictimaiyyətin diqqət mərkəzinə çevrilib. Lakin Moskva vasitəsilə Tehrana ötürülən son mesaj bu gərginliyin azaldılması istiqamətində mühüm diplomatik siqnal kimi dəyərləndirilir. İranın xarici işlər naziri Abbas Əraqçinin sözlərinə görə, Rusiya Prezidenti Vladimir Putin və İsrailin Baş naziri Benyamin Netanyahu arasında baş tutan telefon danışığından sonra Moskva Tehrana İsrailin İranla yeni müharibə istəmədiyi barədə mesaj çatdırıb. Bu, bölgədə sülh və sabitliyin qorunması baxımından diqqətəlayiq siyasi addım hesab olunur.
Məsələ ilə bağlı Crossmedia.az-a açıqlama verən politoloq Zeynal Əmrəliyev bildirib ki, hazırda həm İsraillə əməkdaşlıq edən, həm də İrana yaxın olan yeganə ölkə Rusiyadır:
“İsrail inanır ki, Rusiyanın İrana təsir etmək imkanları güclüdür. Buna görə də bu cür müraciət Rusiyaya ünvanlanıb. Bu, həm də Rusiyaya bir mesajdır ki, əgər müharibə olarsa, öz bitərəfliyini qorusun, yəni İrana qarşı cavab tədbirləri görməsin, dəstək göstərməsin. İsrailin bu addımı xüsusi əhəmiyyət kəsb edir. Düşünürəm ki, bu, İran tərəfindən də müsbət qarşılanacaq. Çünki İran uzun müddətdir ABŞ və İsrailin ona qarşı hərbi zərbə siyasətindən narahat idi. İndi isə bu cür bəyanatların verilməsi İranda kifayət qədər pozitiv atmosfer yaradır".
Politoloq əlavə edib ki, gələcəkdə Rusiya vasitəçiliyi ilə İsrail və İran arasında danışıqların baş tutması mümkündür, lakin bunun üçün Moskvanın beynəlxalq arenadakı mövqeyinin güclənməsi vacibdir: “Şərqi Avropadakı müharibəsi nəticəsində Rusiyanın beynəlxalq imici xeyli zəifləyib. Hazırda Moskva faktiki olaraq "ofsayd" vəziyyətindədir və diplomatik müstəvidə hərəkət etməkdə çətinlik çəkir. Ancaq vəziyyət düzəldikdən sonra Rusiya İsrail və İran arasında çox effektiv vasitəçi rolunu oynaya bilərdi".
Z.Əmrəliyev həmçinin qeyd edib ki, İsraildə keçmiş sovet ölkələrinə, xüsusilə Rusiyaya qarşı simpatiya mövcuddur:
“İsrail cəmiyyətinin aktiv təbəqəsini vaxtilə SSRİ-dən İsrailə köç etmiş insanlar təşkil edir. Onların siyasi partiyası da var — "İsrail bizim evimizdir" partiyası Viktor Libermanın rəhbərliyində fəaliyyət göstərir. Yəni Rusiyanın İsrailə təsiri kifayət qədər çoxdur və eyni zamanda İrana da müəyyən dərəcədə nüfuzu mövcuddur. Bu səbəbdən Moskvanın vasitəçiliyi gələcəkdə iki dövlət arasında diplomatik dialoqun başlanması üçün mühüm baza yarada bilər".
Mehriban Yariyeva
14:28 13.10.2025
Oxunuş sayı: 8499
