Türkiyə-Suriya münasibətlərində yeni mərhələ: XİN başçıları görüşür
Suriya xarici işlər naziri Əsəd Əl-Şeybani yaxın günlərdə Türkiyəyə səfər edəcək. Türkiyənin xarici işlər naziri Hakan Fidanın "TRT Haber"ə verdiyi müsahibəyə görə, çərşənbə günü baş tutacaq görüş zamanı iki ölkə arasında diplomatik əlaqələr və regiondakı aktual məsələlər müzakirə olunacaq. H.Fidan isə görüşdə konkret hansı mövzuların müzakirə ediləcəyini açıqlamayıb. Bu səfər, Türkiyə-Suriya münasibətlərində yeni dialoqun başlanğıcı kimi diqqət çəkir.
Məsələ ilə bağlı Crossmedia.az-a açıqlamasında politoloq Zeynal Əmrəliyev bildirib ki, Türkiyənin sərhədlərinin təhlükəsizliyində Suriyanın rolu böyükdür:
"Uzun müddətdir ki, Suriyadakı vətəndaş müharibəsindən istifadə edən fərqli radikal qruplar Türkiyənin sərhəd təhlükəsizliyi üçün ciddi problemlər yaradırdı. Eyni zamanda Türkiyənin özü də Suriya üçün çox vacib ölkədir. Vətəndaş müharibəsi dövründə faktiki olaraq Suriyadakı insanlara ən böyük dəstək verən ölkə məhz Türkiyə olub. Türkiyə həmin insanlar üçün öz qapılarını açdı və xeyli sayda suriyalını ölümdən xilas etdi. Eyni zamanda türk əsgərinə Suriyada böyük məhəbbət var. Türkiyə Suriyanın ərazi bütövlüyünü və hazırkı Suriya hökumətini böyük ölçüdə dəstəkləyir. Bütün bunlar göstərir ki, Dəməşq və Ankara arasında yaxın münasibətlərin yaranması üçün böyük zəmin var. Bu münasibətlərin inkişafı Suriyada dövlətçiliyin qorunmasına, həmçinin Suriyanın təhlükəsizliyinin və sərhədlərinin bütövlüyünün saxlanmasına mühüm töhfə verəcək".
Politoloq əlavə edib ki, gələcəkdə Suriya və Türkiyənin qarşılaşa biləcəyi təhlükələrin qarşısını almaq üçün bu cür əməkdaşlıqların perspektivləri böyükdür:
"Eyni zamanda ticarət sahəsində, yəni iqtisadi sferada da əməkdaşlıq mümkündür. Suriyada vətəndaş müharibəsi başlamazdan əvvəl Türkiyə Suriyanı mühüm strateji tərəfdaşı hesab edirdi. İqtisadi amillərə əsaslanan əməkdaşlıq həm Türkiyə üçün yeni bazar açır, həm də Suriyanın iqtisadi inkişafına mühüm töhfə verə bilər. Türkiyənin kifayət qədər güclü iş adamları var ki, Suriyaya investisiyalar yatırsınlar. Ankara və Dəməşq arasındakı münasibətlərin yüksək səviyyədə inkişaf etməsi hər iki tərəfə böyük fayda gətirir və yəqin ki, bundan sonra qarşılıqlı səfərlər intensiv şəkildə davam edəcək".
Mehriban Yariyeva
21:25 06.10.2025
Oxunuş sayı: 8868
