HƏMAS-ın fitvası verilib: "Açıq və gizli sponsorlar da ondan imtina edir"
Yaxın Şərqdə yeni mərhələyə keçid baş verir. Uzun illər Qəzza zolağında siyasi və hərbi hakimiyyəti əlində saxlayan HƏMAS təşkilatı bu gün ən zəif mövqeyindədir. ABŞ Prezidenti Donald Trampın “Qəzza planı” ətrafında formalaşan beynəlxalq konsensus tədricən reallaşmağa doğru gedir. İsrail, Misir, Böyük Britaniya və hətta bəzi ərəb dövlətlərinin dəstəyi ilə bölgədə “HƏMAS-sız Qəzza” konsepsiyası aktuallaşıb. Fələstin Administrasiyasının rəhbəri Mahmud Abbasın BMT Baş Assambleyasında səsləndirdiyi çıxış da bu kursun siyasi təsdiqi kimi dəyərləndirilir. Artıq Qəzza zolağının gələcək idarəçiliyi, təhlükəsizlik mexanizmləri və beynəlxalq nəzarət strukturları üzərində razılaşmaların konturları formalaşır.
Mövzu ilə bağlı politoloq, Orta Doğu Araşdırmalar Mərkəzinim sədri Sədrəddin Soltan Crossmedia.az-a açıqlama verib:
“HƏMAS-ın təslim olması Fələstin, İsrail, Misir və Böyük Britaniya, bir sözlə, Trampın Qəzza planına dəstək olanlar üçün əsas məsələdir. Mahmud Abbas Nyu Yorkda BMT-nin baş assambleyasında çıxışı zamanı bölgənin HƏMAS-sız olacağını və Qəzzanın heç bir siyasi mənsubiyyəti olmayan şəxslər tərəfindən idarə olunacağını vəd edib. HƏMAS tərk-silah olunacağını bildirsə də, təşkilat daxilindəki hərbi və siyasi qol olduğundan bu məsələ ilə bağlı birmənalı çıxış edə bilmir. Hesab edirəm ki, HƏMAS-ın Qəzza zolağındakı hakimiyyətinin sonu yaxınlaşmaqdadır və o, hərbi qüvvə kimi zolaqda fəaliyyətini davam etdirə bilməyəcək. Çünki açıq və gizli sponsorlar belə HƏMAS-dan imtina edir. Onlar HƏMAS-sız Qəzza tərəfdarıdır. Bu baxımdan hesab etmək olar ki, HƏMAS-ın fitvası verilib”.
Ayhan
17:46 06.10.2025
Oxunuş sayı: 8612
