Yaxın Şərqlə bağlı yeganə düzgün yol: Türkiyə müdaxilə etməsə...
ABŞ Prezidenti Donald Tramp bunu "Truth Social" sosial şəbəkəsindəki paylaşımında qeyd edib ki, Yaxın Şərqdə nizamlanmaya dair yeni razılaşmaların mümkünlüyünə əminliyini ifadə edib.
"Yaxın Şərqdə böyük bir şeyə nail olmaq üçün real şansımız var. İlk dəfədir ki, hamı xüsusi nəyəsə köklənib. Biz buna nail olacağıq", – deyə o vurğulayıb. Tramp bununla bağlı detalları açıqlamayıb.
Bundan əvvəl Tramp yaxın zamanda Qəzza sektorundakı münaqişənin nizamlanmasına dair, HƏMAS tərəfindən girov saxlanılanların azad olunmasını nəzərdə tutan razılaşmanın imzalana biləcəyini bəyan edib.
Maraqlıdır bu əminliyin fonunda razılaşma olacaqmı?
Məsələ ilə bağlı Crossmedia.az-a açıqlama verən politoloq Əhəd Məmmədli Qəzzada qanın axdığını, XXI əsrin ən dəhşətli cinayətinin baş verdiyini qeyd edib: "Bu faciə bəzən hətta II Dünya Müharibəsinin dəhşətlərindən daha böyük faciə kimi təqdim olunur. Amma sual yaranır: bütün bunlar hansı məqsədə, hansı “məntiqə” söykənir? Mən burada hər hansı əsaslı bir məntiq görmürəm. İsrail açıq şəkildə bəyan edir ki, Qəzzada bir nəfər də olsun müsəlman qalmamalıdır: ya ölməli, ya da məcburən torpağını tərk etməlidir. Digər tərəfdən, onlar HƏMAS getməlidir deyirlər. Halbuki HƏMAS– Qəzzada xalqın iradəsi ilə seçilmiş qüvvədir və silahlı müqaviməti məhz xalqının müdafiəsi üçün həyata keçirir. Bu gün Qəzzada İsrailin soyqırımı və işğalına qarşı faktiki olaraq müqavimət göstərən yeganə güc Hamasdır. İsrail isə istəyir ki, bu qüvvə də sıradan çıxsın və sonra Qəzzanı tam işğal etsin. Təəssüf ki, Fələstin rəhbərlərindən biri olan Mahmud Abbas da bu prosesdə dolayı yolla iştirak edir".
O, bildirib ki, bu, çıxış yolu deyil və HƏMAS geri çəkilməyəcək: "Qəzzada sadə insanlar – qadın, uşaq, qoca demədən hər kəs – imanla və qeyri-adi fədakarlıqla müqavimət göstərirlər. Bu, sadəcə silahlı mübarizə deyil, həm də mənəvi müqavimətdir. İnsanlar bombaların altında yaşayır, evləri dağılır, övladlarını itirirlər, amma doğma torpaqlarını tərk etmirlər. Ana övladını qucağında itirsə də, getmir. Ata ailəsini dəfn edir, amma geri çəkilmir. Uşaq valideynini itirir, yenə də torpağından imtina etmir. Bu, həm iman, həm də şərəf nümunəsidir. Qəzzadakı müsəlmanların göstərdiyi iradə bütün dünyaya, xüsusilə də İslam aləminə misilsiz bir örnəkdir. Bu müqavimət kişilik, ləyaqət və fədakarlığın ən ali formasıdır. Müqayisə üçün Qarabağ hadisələrinə baxmaq kifayətdir. Ermənilər ilk zərbə qarşısında öz torpaqlarını qoyub qaçırdılar. Amma Qəzzada vəziyyət tam fərqlidir – insanlar ölümlə üz-üzədirlər, lakin torpaqlarını tərk etmirlər".
Politoloq, həmçinin burada yeganə düzgün çıxış yolunun olduğunu bildirib: "İsrail işğal etdiyi torpaqlardan çıxmalı, qan axıdılmasına son qoyulmalıdır. Başqa alternativ yoxdur. Əgər müsəlman ölkələri, xüsusilə də Türkiyə öncülük edərək Qəzzaya dəstək üçün müdaxilə etməsə, oradakı soyqırım daha da dərinləşəcək. İsrail arxasında ABŞ-ın dəstəyini görür, amma Qəzzadakı günahsız müsəlmanların arxasında heç kim yoxdur. Onlar təkcə iman gücü ilə, ölümlə üz-üzə dayanırlar".
Elmir Heydərli
12:24 29.09.2025
Oxunuş sayı: 7174
