Saatlıda kibertəhlükəsizlik üzrə təhsil layihəsinə başlanılıb
Azərbaycan Kibertəhlükəsizlik Təşkilatları Assosiasiyasının (AKTA) təşkilatçılığı ilə Saatlı rayonunda kibertəhlükəsizlik üzrə təhsil layihəsinə start verilib.
Crossmedia.az xəbər verir ki, layihənin təqdimatında gənclər, təhsil işçiləri, dövlət və özəl qurumların əməkdaşları iştirak edib.
Tədbirdə AKTA tərəfindən proqramlaşdırma, şəbəkə texnologiyaları və təhlükəsizliyi, həmçinin kibergigiyena tələblərinə xüsusi diqqət çəkilərək, kibertəhlükəsizlik üzrə mütəxəssis hazırlığı barədə ətraflı məlumat verilib.
AKTA-nın icraçı direktoru Rauf Cabarov, quzumun eksperti Rəşad Əliyev, AKTA üzvü olan Cybersign şirkətinin direktoru Elvin Axundov və AKTA kiber diaspora üzvü Elgün Bəxtiyaroğlu iştirak edib və fərqli mövzularda çıxışlar ediblər.
Tədbirdə Saatlı rayonunda kibertəhlükəsizlik üzrə təhsil layihəsinə start verildiyi elan olunub.
Saatlı rayon İcra Hakimiyyətinin başçısı Elmir Bağırov AKTA-nın bu təşəbbüsünü təqdirəlayiq hesab edərək, layihəyə dəstək veriləcəyini bildirib.
Regionlarda başladılan layihə çərçivəsində Mərkəzi Aran regionunda Saatlı və ətraf rayonların gəncləri proqramlaşdırma, şəbəkə texnologiyaları və kibertəhlükəsizlik sahəsində CISCO Şəbəkə Akademiyası ("CISCO Network Academy") beynəlxalq təlim platformasının təqdim etdiyi müasir tədris proqramları ilə təmin ediləcəklər.
Təlimlər AKTA-nın peşəkar və beynəlxalq təlimçi statuslu ekspertləri tərəfindən təşkil olunacaqdır. Təlimlərdə beynəlxalq CISCO Şəbəkə Akademiyasının resurslarından limitsiz istifadə ediləcək.
Təlimlərin sonunda iştirakçılara AKTA və CISCO Şəbəkə Akademiyasının sertifikatları təqdim ediləcək. Eyni zamanda AKTA və CISCO Şəbəkə Akademiyası arasında mövcud razılaşmaya əsasən bu təlimləri bitirən mütəxəssislərin beynəlxalq sertifikat imtahanına müraciəti zamanı tələb olunan ödənişə 60% endirim tətbiq ediləcək.
Layihə çərçivəsində kiber maarifləndirmə tədbirləri Saatlı rayon məktəblərində davam etdiriləcək. Burada şagirdlərə və müəllimlərə kibergigiyena haqqında zəruri məlumatlar veriləcək.
Qeyd edək ki, bu təşəbbüs AKTA-nın regionlarda həyata keçirdiyi ilk pilot layihə olmaqla gələcəkdə digər rayonlarda davam etdiriləcək.
16:58 17.09.2025
Oxunuş sayı: 602
