İsrailin "Yaxın Şərq" meydanında davam edən şıltaqlığı: Qətərə hücum göstərdi ki, yaxın vaxtda ...
Qətər rəhbərliyi İsrailin Dohada Fələstinin HƏMAS siyasi bürosunun üzvlərinə zərbə endirməsi ilə əlaqədar Qəzza zolağında münaqişənin həllinə yönəlmiş vasitəçilik səylərini dayandırmaq qərarına gəlib.
İsrail Dohada Fələstinin HƏMAS hərəkatının yüksək rütbəli liderlərini məhv etmək üçün keçirdiyi əməliyyat nəticəsində Qəzzanın vasitəçiliyini dayandırmasının bundan sonra nələrə səbəb ola biləcəyi barədə siyasi şərhçi Kənan Novruzov Crossmedia.az-a açıqlama verib: "İsrailin hərəkətində iki mühüm məqam diqqət çəkir. Birincisi, İsrailin HƏMAS heyətini hədəf almasıdır. Bu, İsrailin HƏMAS-la danışıqlar apardığı bir vaxtda müharibənin bitməsində maraqlı olmadığını, əksinə uzanmasına hazır olduğunu göstərir. İkincisi, Qətərin hədəf alınmasıdır. Qətər indiyə qədər vasitəçi rolunda idi, amma İsrail onu hədəf alaraq göstərdi ki, vasitəçiliyə və müharibənin sona çatmasına ehtiyacı yoxdur. Hazırkı İsrail hakimiyyəti müharibəni davam etdirməkdə israrlıdır. Bu da məntiqidir: müharibə başa çatarsa, ölkədə hakimiyyət dəyişəcək və Baş nazir Benyamin Netanyahunun mövqeyi risk altında qalacaq".
Müsahibimiz söyləyib ki, İsrail ABŞ-nin dəstəyinə arxalanaraq belə addımlar atır: "Lakin bu, ölkəni getdikcə daha çıxılmaz vəziyyətə gətirir. Qətərə hücum göstərdi ki, yaxın vaxtda Yaxın Şərqdə sülh görünmür, sabitlik olmayacaq. Əksinə, perspektivdə İsrailin İrana qarşı yeni hücumları mümkündür və bölgədəki gərginlik daha da genişlənə bilər. Bu isə həm təhlükəli ssenari, həm də İsrail üçün ciddi risklər deməkdir”.
Mehriban Yariyeva
12:56 10.09.2025
Oxunuş sayı: 943
