Qəbul imtahanlarında yüksək nəticə göstərən tərtərli gənclər mükafatlandırılıb
Bu il Tərtər rayonunun orta ümumtəhsil məktəblərini bitirən məzunlardan 217 nəfəri ali məktəblərə qəbul olub. Gənclərdən 10 nəfər 600-dən yuxarı, 19 nəfər 500-dən yuxarı bal toplayıb.
Crossmedia.az xəbər verir ki, bu faktlar Tərtər rayonunda 2025-ci ildə ümumtəhsil məktəblərini bitirərək ali məktəbə daxil olan gənclərlə keçirilən görüşdə səsləndirilib. Tədbir iştirakçıları əvvəlcə Ümummilli Lider Heydər Əliyevin Tərtər şəhərinin mərkəzi meydanındakı abidəsini ziyarət edərək önünə gül dəstələri qoyublar.
Tədbirin əvvəlində Azərbaycanın Dövlət Himni səsləndirilib, Ümummilli Lider Heydər Əliyevin və şəhidlərin xatirəsi bir dəqiqəlik sükutla yad edilib.
Tərtər Rayon İcra Hakimiyyətinin başçısı Müstəqim Məmmədov, Milli Məclisin deputatı Anar Məmmədov, akademik Vaqif Abbasov, YAP rayon təşkilatının sədri Eldar Əsədov və başqaları çıxış edərək tələbə adını qazanan gəncləri təbrik edib, onlara təhsildə və gələcək həyatda uğurlar arzulayıb, yüksək bilikli mütəxəssis kimi yetişməyi və Vətənə ləyaqətlə xidmət göstərməyi tövsiyə ediblər.
Çıxışlarda ölkəmizdə təhsilin inkişafı, onun maddi-texniki bazasının möhkəmləndirilməsi istiqamətində görülən işlərdən, həyata keçirilən layihələrdən söz açılıb. Bildirilib ki, bu il Bəyimsarov kənd tam orta məktəbi, Kəngərli kənd körpələr evi-uşaq bağçası əsaslı, şəhər 1 nömrəli tam orta və Qazyan kənd ümumi orta məktəbləri cari təmir olunub. Hazırda Bəyimsarov, Qazyan və Hüsənli kənd körpələr evi-uşaq bağçalarında əsaslı təmir işləri aparılır.
Gənclər tədbirin təşkilinə görə minnətdarlıqlarını bildirib, öz sevinclərini bölüşüblər. Sonda yüksək bal toplayan gənclərə fəxri fərman və hədiyyələr verilib.
16:53 06.09.2025
Oxunuş sayı: 5616
