Diaspor

Finlandiyada soydaşımızın ”Möhtəşəm Bakı” adlı rəsm sərgisi açılıb

Finlandiyanın Həmeenlinna şəhər kitabxanasında azərbaycanlı rəssam Çingiz Abasovun “Möhtəşəm Bakı” adlı fərdi rəsm sərgisi açılıb.

Sərginin Azərbaycan Respublikasında “Konstitusiya və Suverenlik İli” çərçivəsində təşkil olunması ilə xüsusi əhəmiyyət kəsb edir.

Crossmedia.az xəbər verir ki, rəssamın əsərlərində Bakının gözəlliyi, ruhu və müasir görünüşü ilə yanaşı, şəhərin zəngin tarixi və müasir inkişafı yüksək bədii ustalıqla əks olunub.

Çingiz Abasov yaradıcılığında Azərbaycan mədəniyyətinə və dəyərlərinə sadiq qaldığını, əsərləri vasitəsilə ölkəmizin zəngin irsini yaşatdığını deyib. Onun xüsusilə 2021-ci ildə paytaxt Bakıda çəkdiyi “Qarabağ – 30 il və 44 gün” əsəri ictimai marağa səbəb olub. Vətən müharibəsində qazanılan Zəfərə ithaf olunan tabloda xalqımızın mübarizə əzmi, tarixi yaddaşı və gələcəyə inamı əbədiləşib.

Qeyd edək ki, diasporumuzun fəal üzvü olan Çingiz Abasov 30 ildən çoxdur ki, Finlandiyada yaşayır və Azərbaycanın mədəniyyətinin təbliğinə töhfə verir.