Suriya bu halda İsraillə anlaşa biləcək- Politoloq
Suriya və Türkiyə müdafiə nazirlikləri müdafiə sahəsində yeni əməkdaşlıq sazişi imzalayıblar.
Saziş Suriya Ərəb Ordusunun döyüş qabiliyyətini və peşəkarlığını gücləndirməyə yönəlmiş geniş spektrli istiqamətləri əhatə edir. Xüsusilə, ixtisaslaşdırılmış kurslarda və təlim proqramlarında iştirak etmək üçün hərbi heyətin müntəzəm mübadiləsi nəzərdə tutulur ki, bu da iki ölkənin silahlı qüvvələri arasında hazırlıq səviyyəsini artırmağa və koordinasiyanı yaxşılaşdırmağa imkan verəcək.
Xüsusi diqqət Suriya hərbçilərinin terrorizmə qarşı mübarizə, kibertəhlükəsizlik, minatəmizləmə, hərbi mühəndislik, logistika, həmçinin qabaqcıl beynəlxalq standartlara uyğun olaraq sülhməramlı əməliyyatlarda iştirak kimi prioritet sahələrdə peşəkar hazırlığına yönəldilir.
Bundan əlavə, saziş texniki yardımın göstərilməsini nəzərdə tutur: Türkiyə Suriya Ərəb Ordusunun komanda strukturlarının, silahlanmasının və təşkilati sistemlərinin modernləşdirilməsinə kömək etmək üçün ixtisaslaşmış ekspertlər göndərəcək ki, bu da Suriyanın hərbi sektorunun islahatında mühüm addım olacaq.
Hər iki tərəf Suriyada ölkənin suverenliyini, sabitliyini və ərazi bütövlüyünü təmin edə biləcək müasir, intizamlı və döyüş qabiliyyətli ordunun yaradılmasına sadiqliyini vurğulayıb.
Politoloq, Orta Doğu Araşdırmalar Mərkəzinin sədri, politoloq Sədrəddin Soltan əldə olunan razılaşma barədə Crossmedia.az-a danışıb.
O, bildirib ki, Suriyada vəziyyət çox qarışıq və ziddiyətlidir: "Bunun səbəblərindən biri Suriyada mərkəzi hakimiyyətin ölkədə bütün qrupları təmin etməyə və bütün qruplarla əməkdaşlığa nail olabilməməsinin göstəricisidir. Həmçinin, Suriyada bütün qrupları birləşdirəcək güc və proqramın olmamasıdır. Başqa səbəb isə Suriyada hadisələrə kənar müdaxilələrin çoxluğu, eləcə də keçmiş Bəşşar Əsəd hakimiyyətini dəstəkləyən ölkələrin müdaxiləsidir. Bu müdaxilələr Suriyada çox qarışıq vəziyyət yaradır. Əhməd Əş Şara hakimiyyəti bütün ölkələrlə münasibətləri normal saxlamağı beyan edir".
S.Soltanın sözlərinə görə, qeyd olunan ölkələr Səudiyyə Ərəbistan, Birləşmiş Ərəb Əmirliyi, Qətər, İsrail, Rusiya, Türkiyə, ABŞ-dir: " Suriya hakimiyyəti üçün daha münasib Türkiyə təhlükəsizliyi məsələləri də var. Bu hərbi cəhətdən NATO deməkdir. Yəni, Türkiyə Suriya münasibətində həm Avropa, NATO, həm də ABŞ-lə bir blokdadır. Bu, həm də Türkiyənin terrora qarşı mübarizə təcrübəsinin çox olduğuna görədir. Və Türkiyənin Suriyanın ərazi bütövlüyünü tanımasıdır. Bu ölkədə ikinci bir dövlət qurumu müəssisəsinin təşkilatının yaranmasına qarşı olmasıdır. Suriyadakı hakimiyyətin və onu dəstəkləyən qrupların marağı, Türkiyənin Suriyaya olan siyasəti ilə tutuşduğuna görə, Suriyaya üstünlük verilib. Suriya-İsrail münaqişəsi hələ davam edir. Hesab edirəm ki, perspektivdə, başqa ərazilərdə Suriya hakimiyyəti sabitlik və vətəndaşların təhlükəsizliyini təmin edə bilərsə, o halda İsrail ilə də anlaşa biləcək".
Fatimə Məmmədova
15:26 14.08.2025
Oxunuş sayı: 1409
