"Netanyahu yaxın zamanda Qəzzanı tam işğal etmək fikrindən asanlıqla imtina etməyəcək" - POLİTOLOQ
İsrailin Baş naziri Benyamin Netanyahu xarici media nümayəndələrinə açıqlamasında bildirib ki, İsrailin Qəzza şəhərini ələ keçirmə planı işğal məqsədi daşımır. Onun sözlərinə görə, əsas hədəf Qəzzanı HƏMAS terrorçularından azad etmək və “ümumi təhlükəsizlik məsuliyyətini” qorumaqdır. Netanyahu müharibədən sonrakı planlarda Qəzzanın hərbiləşmədən çıxarılacağını, sərhəddə təhlükəsizlik zonası yaradılacağını və mülki idarəetmənin qurulacağını vurğulayıb.
Əslində isə müharibə faktiki olaraq Qəzza uğrunda gedir. Doğrudanmı, hər şey Netanyahunun dediyi kimidir və İsrailin Qəzzanı tutmaq fikri yoxdur?
Bu barədə Crossmedia.az-a danışan politoloq, professor Əlimusa İbrahimov bildirib ki, bugün Qəzzada baş verənləri yalnız Netanyahunun istəyib-istəməsindən asılı adlandırmaq düzgün olmaz: "Çünki Netanyahu müxtəlif fikirlər arasında vurnuxur və hansı fikri qəbul edəcəyi hələ məlum deyil. Baş nazir istərdi ki, Qəzzanı tamamilə boşaltsın və ya oradakı silahları uzaqlaşdırsın, Qəzzanı təhlükəsiz zonaya çevirsin. Amma buna gücü çatıb-çatmayacağı və dünya ictimaiyyətinin buna imkan verib-verməyəcəyi sual altındadır. Hazırda Qəzzanın tam işğal olunması məsələsi gündəmdədir və Netanyahu bu barədə müvafiq razılığı olub. Lakin dünya dövlətləri, xüsusilə BMT, Netanyahunu bu fikrindən çəkindirilməyə çağırır. Son günlər Fələstin dövlətini tanımaq istəyən və tanıyan dövlətlərin sayı artır, Netanyahuya qarşı təzyiqlər güclənməkdədir. ABŞ bu məsələdə ciddi təzyiqlərlə üz-üzədir".
Ə. İbrahimov əlavə edib ki, Netanyahu istədiyi kimi Qəzzanı tamamilə boşaltmaq, silahları uzaqlaşdırmaq və sivil idarəetmə qurmaq planlarını həyata keçirməkdə çətinlik çəkir: "Qəzzanın taleyi hələ məlum deyil və vəziyyət qeyri-müəyyən olaraq qalır. Qəzzada humanitar böhran dərinləşməkdədir, aclıq yayılıb, insanların yemək və içməyə ehtiyacı var, yaşayış şəraiti isə ağırdır. Dünya dövlətləri İsrailə bu məsələlərdə təsir göstərə bilmir, uzunmüddətli su təchizatı barədə danışmaq hələ erkəndir. Netanyahu yaxın zamanda Qəzzanı tam işğal etmək fikrindən asanlıqla imtina etməyəcək. Lakin dünya ictimaiyyətinin təzyiqləri artdıqca bəzi fikirlərindən geri çəkilə bilər. ABŞ-nin bu məsələdə mühüm rol oynaması gözlənilir".
Mehriban Yariyeva
16:07 11.08.2025
Oxunuş sayı: 1030
