"ABŞ HƏMAS hərəkatının mövqelərini zəiflətməyə çalışır"- RƏY
ABŞ Prezidentinin Yaxın Şərq üzrə xüsusi nümayəndəsi Stiv Uitkoffun sözlərinə görə, hazırda prioritet məsələ Qəzza zolağında hərbi əməliyyatların tam dayandırılması, eyni zamanda İsrail və HƏMAS arasında girovların azad olunması da daxil olmaqla hərtərəfli razılaşmanın əldə edilməsidir. Onun fikrincə, bu istiqamətdə atılacaq hər bir addım regionda vəziyyətin sabitləşməsinə xidmət etməlidir.
Məlum olduğuu kimi, Yaxın Şərqdə vəziyyət kifayət qədər gərgindir. Belə bir vəziyyətdə Qəzzada hərbi əməliyyatların yaxın zamanda dayandırılması çoxlarına nonsens kimi gəlir.
Məsələ barədə Crossmedia.az-a danışan hərbi-siyasi ekspert Həşim Səhrablı isə düşünür ki, indiki şəraitdə ABŞ-nin bu bəyanatı, təbii ki, problemi həll etmək üçün yetərli hesab etmək olmaz. Ekspertin sözlərinə görə, bu bəyanat daha çox Qəzzada hələ də müqavimət göstərən HƏMAS hərəkatının mövqelərini zəiflətməyə xidmət edir: “Şərtlərə tab gətirmək və cavab verə bilmək üçün HƏMAS-ın əlindəki ən real "kartlardan" biri də məhz bu girovlardır. Yəni HƏMAS sabah, üç gün, beş gün sonra və ya hər nə vaxtsa artıq o girovları geri qaytararsa, bu o deməkdir ki, əlindəki ən real və ən təsirli "kartı" itirmiş olacaq. Belə olan halda da onun Qəzzada İsrailə qarşı mübarizə aparması qeyri-mümkün olacaq”.
Ekspert qeyd edib ki, HƏMAS istədiklərinə nail olmadan və ya ən azından tələblərinin bir hissəsini reallaşdırmadan girovları geri qaytarmayacaq: "Bu isə o deməkdir ki, sadəcə girov məsələsini əsas götürərək Qəzza münaqişəsinin həllini düşünmək, reallıqdan uzaq yanaşmadır. Əgər problem ancaq girovlarla məhdudlaşsaydı, Qəzzadakı münaqişə çoxdan həllini tapmış olardı. Yəni İsrail qüvvələri geri çəkilərdi, HƏMAS da əlindəki girovları beynəlxalq təşkilatların və ya üçüncü dövlətlərin vasitəsilə geri verərdi və məsələ bağlanardı. Amma Qəzzada məsələ təkcə girovlardan ibarət deyil. İsrailin əsas məqsədi HƏMAS tərksilah edib Qəzza zolağına tam nəzarəti ələ almaqdır. Bu istiqamətdə ABŞ və digər Qərb ölkələrinin İsraili hərtərəfli dəstəklədiyi açıq görünür".
Onun sözlərinə görə, digər tərəfdən HƏMAS-ın da öz strateji məqsədləri var: "İsrail qüvvələrini bölgədən geri çəkdirmək, Fələstin dövlətinin beynəlxalq hüquqla tanınmasını təmin etmək, işğal olunmuş ərazilərdən İsrailin çəkilməsinə nail olmaq və nəhayət, suveren bir Fələstin dövlətinin həm İsrail, həm də ABŞ tərəfindən rəsmən tanınmasını təmin etmək əsas hədəflərdəndir. Burada yalnız hərbi və siyasi deyil, eyni zamanda dərin geosiyasi və ideoloji qarşıdurmalar mövcuddur. Bu qarşıdurmaların say və mahiyyəti o qədər çoxdur ki, təkcə girov məsələsini həll etməklə Qəzzada sabitlik və ya atəşkəsin əldə olunacağına inanmaq sadəlövhlük olardı. Əsas ziddiyyətli məqamlar qalmaqdadır və bu məqamlar öz həllini tapmadan bölgədə nə sülhdən, nə də dayanıqlı atəşkəsdən danışmaq mümkündür”.
Mehriban Yariyeva
14:15 04.08.2025
Oxunuş sayı: 7594
