İsrail dövləti daha ciddi təhdid altındadır - AÇIQLAMA
İsrail parlamenti Knesset – İordan çayının qərb sahilinin ilhaqına dair mübahisəli qətnaməni qəbul edərək, Yaxın Şərqdəki siyasi gərginliyi daha da artırıb. Qətnamədə bu torpaqların “yəhudi xalqının tarixi və mənəvi vətəninin ayrılmaz hissəsi” olduğu vurğulanaraq, geniş dəstək ilə təsdiqlənib. Bu addım beynəlxalq hüquq normalarına və iki dövlətli həll prinsipinə zidd olaraq, Fələstin xalqının suverenlik hüquqlarına ciddi təhdid kimi qiymətləndirilir.
Fələstin Muxtariyyətinin Prezidenti Mahmud Abbas qərarı qətiyyətlə pisləyərək, onun iki dövlət prinsipini tamamilə rədd etdiyini və fələstinlilərin hüquqlarına açıq-aşkar təcavüz olduğunu bəyan edib. O həmçinin vurğulayıb ki, Fələstin xalqı bu ilhaq siyasətini tanımayacaq və beynəlxalq ictimaiyyət bu gedişata qarşı reaksiya verməlidir.
Mövzu ilə bağlı Crossmedia.az-a açıqlama verən politoloq Əli Zülfüqaroğlu bildirib ki,
İsrailə hakim olan sionist dini-ideoloji düşüncənin mahiyyəti, İsrail dövlətinin ərazi baxımından genişlənməsinə əsaslanır:
“Bu səbəbdən bir sıra Avropa İttifaqı ölkələri və ABŞ iki dövlətli həll prosesini dəstəkləsə də, ABŞ-dəkı sionist lobbi və İsraili idarə edən sionist ideologiya bu prosesin reallaşmasına imkan verməyib. Həmasa qarşı əməliyyatlar, Suriyaya, İrana və Livana yönəlmiş hərbi təşəbbüslər — bütün bunların kökündə məhz iki dövlətli həllin ləngidilməsi dayanır. Əgər İsrail beynəlxalq hüququn tələblərinə əməl etsəydi, HƏMAS, FƏTH və digər müqavimət hərəkatları da yaranmazdı. Bu hərəkatların mövcudluğu, əslində, İsrail hökumətinin iki dövlətli həllə mane olmasından qaynaqlanır. Hazırda İsrail ciddi daxili böhranla üzləşib. Cəmiyyətdə kütləvi narazılıq və psixoloji gərginlik hökm sürür. Baş nazir Benyamin Netanyahu korrupsiya ittihamları ilə üzləşib və Beynəlxalq Cinayət Məhkəməsi tərəfindən onun haqqında həbs qərarı verilib. Bu səbəbdən o, Britaniya kimi yaxın müttəfiq ölkələrə belə səfər edə bilmir. Belə bir şəraitdə Netanyahu həm siyasi karyerasını qorumaq, həm də ona qarşı yönəlmiş ittihamları arxa plana keçirmək üçün radikal addımlar atmağa çalışır. İrana qarşı əməliyyatlardan sonra qalib lider obrazı formalaşdırmaq istədi, lakin bu cəhdi uğursuz oldu və daxili narazılıq səngimədi. Hökumət daxilində çatlar var və bu da Netanyahu üçün ciddi problemlərin yarandığını göstərir. Bütün bu proseslərin kökündə isə İsrailin genişlənmə siyasəti dayanır”.
Ə.Zülfüqaroğlunun sözlərinə görə, “Böyük İsrail”in qurulması istiqamətində işğalçı addımlar davam etdirilir:
“Suriyaya qarşı hərbi əməliyyatların davamı, Qolan təpələrinin və Livanın bir hissəsinin işğalı, Davud dəhlizinin formalaşdırılmasına cəhd, PKK-nın YPG qanadının dəstəklənməsi və Suriyanın parçalanması kimi fəaliyyətlər bu siyasətin elementləridir. Netanyahu, İsrail tarixində əraziləri 20% genişləndirən yeganə lider kimi özünü təqdim edir və bu çərçivədə siyasi mövqeyini qorumağa çalışır. Lakin mövcud vəziyyət göstərir ki, İsrail xalqı hökumətin bu siyasətindən narazıdır və cəmiyyət artıq iki yerə bölünüb. Hökuməti dəstəkləyən qüvvələrin sayı azalır. Bu da onu deməyə əsas verir ki, qarşıdakı dövrlərdə İsrail həm daxili, həm də xarici təhdidlərlə üzləşəcək. Suriyaya qarşı Druzlar vasitəsilə separat fəaliyyəti, İordan çayının qərb sahilinin ilhaqı və digər işğal niyyətləri birbaşa sionizm ideologiyasının davamı kimi qiymətləndirilməlidir. Netanyahu özünü xilas etməyə çalışsa da, bu amillər onun xilası üçün əsas olmayacaq. Hökumət ciddi problemlərlə üzləşib və İsrail dövləti daha ciddi təhdid altındadır. Qəzzada törədilən qırğınlar yalnız Həmasın gücünü azaltmadı, eyni zamanda milyonlarla insanın düşüncəsində müqavimət ideyasını möhkəmləndirdi. İsrail xalqı bu reallığı anlayır və hökuməti sorğulamaqda davam edir. Qəzzaya və Druzlara qarşı aparılan uğursuz əməliyyatlar İsrail hökumətinin son çırpıntıları kimi dəyərləndirilməlidir. Dövlət ağlı ilə idarə olunmayan siyasi sistemin addımları İsrailin milli maraqlarını zərbə altında qoyur. Bu səbəbdən İsrail hökuməti daxili təhdidlərdən qorunmaq üçün yeni işğal planları ilə cəmiyyətə guya xarici siyasətdə uğurlu nəticələr əldə etdiyini çatdırmağa çalışır. Lakin hökumətin son addımları nə Netanyahunu xilas edəcək, nə də İsrailin beynəlxalq nüfuzunun bərpa olunmasına gətirib çıxaracaq. Son xaotik addımlar İsrail hökumətinin sonunun yaxınlaşdığına dair siqnallar verir”.
Nəzrin Salmanova
19:08 25.07.2025
Oxunuş sayı: 11030
