"İranda daxili siyasi vəziyyət gərginləşəcək" - Ekspert
İranın daxili siyasi həyatı bir çox hallarda ölkə rəhbərliyi daxilindəki ziddiyyətlərin və qarşıdurmaların fonunda formalaşır. Xüsusilə prezident və dini liderin ətrafında cəmlənmiş fərqli siyasi dairələrin mövcudluğu, bu ölkədəki hakimiyyət balansını daim gərgin və dəyişkən saxlayır. Bu vəziyyət yalnız daxili idarəetmədə deyil, həm də İranın xarici siyasət kursunda öz əksini tapır. Son dövrlərdə islahatçı və mühafizəkar qüvvələr arasında gedən çəkişmələr isə ölkə daxilindəki sabitliyi bir qədər də kölgə altına salır.
Mövzu ilə bağlı politoloq Oqtay Qasımov Crossmedia.az-a açıqlama verib:
“İranda prezident və dini liderin ətrafında birləşən qruplar arasında rəqabət və gərginlik ilk deyil. Bu müxtəlif dövrlərdə, müxtəlif dövlət başçıları ilə, dini liderin ətrafına toplanan bir qrup şəxsin apardığı hakimiyyət mübarizəsidir. Bu mübarizəni aparanlar həm də Sepah-a yaxın olan şəxslərdir ki, onlar paralel strukturlar kimi fəaliyyət göstərir. Nəzərə alsaq ki, hazırda İran parlamentində də Sepah-a yaxın qüvvələr üstünlük təşkil edir, bu da özünü həm büdcə həm də digər məsələlərdə göstərir. Həmçinin İranda müdafiə nazirliyi ilə də sepah arasında gizli rəqabət var. Sepah şəxsi heyəti müdafiə nazirliyi heyətinin sayından qat-qat az olsa da onlara ayrılan vəsait müdafiə nazirliyindən çoxdur ki, bu da gərginliyə səbəb olur. Digər tərəfdən İrandakı idarəetmə sistemi orta əsrlərin idarə etmə sistemidir və müasir dövrlə ayaqlaşmır. Bununla bağlı müzakirələrdə münaqişələr yaradır”.
Politoloq həmçinin bildirib:
“İslahatçılar hesab edir ki, xarici siyasətdə yumşalmalar olmalıdır, müəyyən islahatlar aparılmalıdır. Bu da xüsusən Pezeşkian hakimiyyətə gələndən sonra daha çox eşidilməyə başladı. Pezeşkian qonşu dövlətlərlə normal münasibətlər qurmaq istəyən və başqa dövlətlərin daxili işlərinə qarışmayan siyasi xəttin tərəfdarıdır. Bu da bəzi dairələri narahat edir. İran-İsrail müharibəsində də İranın ciddi zərbələr almasının günahkarı dini lider və sepahdır. Burda Pezeşkian hakimiyyətinin günahkar olduğunu demək düzgün deyil. Hazırda Pezeşkianın gündəmə gətirilməsinin əsas səbəbi onun İranda olan problemləri gündəmə gətirib həll etməyə çalışmasıdır. Bu islahat və yenilikləri də qəbul etməyənlər Pezeşkiana qarşı kompaniya aparır. Pezeşkiana edilən hücumlar İranda daxili siyasi vəziyyəti gərginləşdirəcək”.
Ayhan
14:11 17.07.2025
Oxunuş sayı: 11495
