Təbrizdə və Tehranda partlayışlar - təxribat yoxsa qəza
Dünən İranın Tehran şəhərində yüksəkmərtəbəli binada baş verən partlayış və bu gün Təbriz şəhərində yerləşən “Sahənd” sənaye kompleksindəki güclü partlayış ölkədə ciddi narahatlıq doğurub. Yerli media orqanlarının yaydığı ilkin məlumatlara görə, partlayışın texniki nasazlıq səbəbindən baş verdiyi ehtimal edilir. Lakin İran daxilindəki strateji obyektlərə qarşı yönələn hücumları nəzərə aldıqda, bu partlayışın sadəcə texniki qəza ilə izah olunması bəziləri üçün inandırıcı görünmür. Xüsusilə İsrailin son illər İranın nüvə və hərbi obyektlərinə qarşı həyata keçirdiyi hədəfli əməliyyatlar fonunda, bu partlayışın mümkün xarici müdaxilə və ya sabotaj nəticəsi olması ehtimalı da istisna edilmir. Belə suallar yaranır: Görəsən, “Sahənd” sənaye kompleksindəki partlayış təsadüf idimi, yoxsa arxasında daha dərin geosiyasi motivlər dayanır?
Mövzu ilə bağlı politoloq Hüseyn İbrahimov Crossmedia.az-a açıqlama verib:
“Hamımıza məlumdur ki, bu partlayış Təbrizdə sənaye kompleksində baş verib. Ancaq bunun İsraillə hər hansı bir əlaqəsinin olduğunu düşünmürəm. Çünki ilkin ehtimallar rəsmi məlumatları araşdırmaqla kifayətlənir. Digər tərəfdən də bu hadisənin texniki məsələlərdən yarandığını bildirilir. Əgər hər hansı bir dövlətlə yaxud İsraillə bağlı olsaydı yəqin ki, İran bunu ictimaiyyətə bildirərdi. Nəzərə alaq ki, İran müharibədən yeni çıxmış bir dövlətdir və qısa müddətdə olsa birbaşa İsrail və ABŞ ilə aralarında gərginlik yarandı. Gərginlikdən sonra bəzən dövlətlər bu kimi halları düşmən obrazı üzərinə yaxud kiməsə yönəldirlər. Halbuki hazırda bu cür baxışlar və fikirlər yoxdur. Bu göstərir ki, İran bu partlayışla bağlı kənarda düşmən axtarmır”.
Ayhan
17:38 11.07.2025
Oxunuş sayı: 683
