Beşinci “Yüksəliş” müsabiqəsinin yarımfinal mərhələsi başa çatıb
Beşinci “Yüksəliş” müsabiqəsinin yarımfinal mərhələsi başa çatıb.
Crossmedia.az xəbər verir ki, tədbirdə çıxış edən gənclər və idman nazirinin müavini, “Yüksəliş” müsabiqəsinin İşçi Qrupunun rəhbəri Fərhad Hacıyev iştirakçılara uğurlar arzulayıb.
Müsabiqənin əsas məqsədinin idarəetmə potensialına malik istedadlı şəxslərin aşkara çıxarılması və onların inkişafına dəstək verilməsi olduğunu vurğulayan Fərhad Hacıyev bu prosesdə əməyi keçən işçi qrupuna, ekspertlərə və könüllülərə təşəkkürünü bildirib.
“Bakı Ekspo Mərkəzi”ndə baş tutan yarımfinal mərhələsində müsabiqənin öncəki mərhələlərini uğurla başa vurmuş 329 nəfər finalçı olmaq uğrunda mübarizə aparıb.
Xatırladaq ki, “Yüksəliş” müsabiqəsinin beşinci mövsümünün yarımfinal və final mərhələləri “Bu bir işarədir” şüarı altında keçirilir. Builki konsept Prezident İlham Əliyevin Sərəncamı ilə elan edilmiş “Konstitusiya və Suverenlik İli”nə həsr olunmaqla yanaşı, həm də 44 günlük Zəfərin 5 illiyinin və “Yüksəliş” müsabiqəsinin 5-ci mövsümünün əlamətdar olmasını özündə əks etdirir.
Üç gün davam edən yarımfinal mərhələsi çərçivəsində namizədlər 9 səriştə üzrə (strateji düşüncə, effektiv liderlik, qərarvermə, nəticəyönümlülük, işin effektivliyinin idarə edilməsi, adaptivlik, innovativ düşüncə, komanda işi və əməkdaşlıq, etika və dürüstlük) ekspertlər tərəfindən qiymətləndiriliblər.
Qeyd edək ki, yarımfinal mərhələsinə hazırlıq çərçivəsində qiymətləndirici ekspertlər üçün üçgünlük təlim proqramı təşkil olunub. Təlimlərə 100-ə yaxın ekspert cəlb edilib. Onlar real imtahan mühitinə yaxınlaşdırılmış simulyasiya olunmuş situasiyalar üzərindən iştirakçıların bacarıqlarını qiymətləndirməklə yanaşı, qiymətləndirmə meyarları, qiymətləndirmə mərkəzlərinin fəaliyyəti və ekspertlərin funksiyaları barədə də ətraflı məlumatlandırılıblar. Qiymətləndirmə prosesi beynəlxalq təcrübəyə əsaslanan və obyektivliyi ilə seçilən “Qiymətləndirmə konfransı”(Assessment Conference) metodu ilə həyata keçirilir. Bu metod hər bir iştirakçının performansına çoxşaxəli yanaşmanı təmin edir və yekun qərarların kollegial əsasda verilməsinə imkan yaradır.
Yarımfinal mərhələsinin nəticələri növbəti 3-5 iş günü ərzində açıqlanacaq. Mərhələni uğurla başa vuran iştirakçıları qarşıda final mərhələsi gözləyir. Qeyd edək ki, 100-ə yaxın iştirakçı final mərhələsinə keçid haqqı qazanacaq. Müsabiqənin final mərhələsi 18-20 iyul tarixlərində baş tutacaq. Bununla da beşinci “Yüksəliş” müsabiqəsi yekunlaşacaq.
"Yüksəliş" müsabiqəsi Azərbaycan Respublikasının Prezidenti cənab İlham Əliyevin 26 iyul 2019-cu il tarixli Sərəncamı ilə təsis edilib. Müsabiqənin qalibləri mentorlar tərəfindən birillik fərdi inkişaf planı ilə təmin olunur və 20 min manatlıq mükafat qazanırlar.
Sayca beşinci “Yüksəliş” müsabiqəsinin keçirilməsi ilə bağlı Azərbaycan Respublikasının Prezidenti cənab İlham Əliyev tərəfindən 18 dekabr 2024-cü il tarixində müvafiq Sərəncam imzalanıb.
11:37 08.07.2025
Oxunuş sayı: 7731
