ABŞ-nin xəyalı gerçək olur?: “İranda rejim dəyişikliyi…”
ABŞ prezidenti Donald Tramp İranda rejim dəyişikliyinə eyham vurub.
O, bu barədə “Truth” sosial şəbəkəsində yazıb.
“Rejim dəyişikliyi ifadəsini işlətmək siyasi baxımdan düzgün deyil, amma indiki İran rejimi ölkəni yenidən böyük edə bilmirsə, niyə rejim dəyişmir?”, - deyə o bildirib.
Bundan əvvəl Donald Tramp Amerikanın zərbələri nəticəsində İranın nüvə infrastrukturuna böyük ziyan dəydiyini bildirib. Onun sözlərinə görə, “B-2” pilotları əməliyyatı uğurla başa vuraraq Missuri ştatına təhlükəsiz eniş ediblər.
İyunun 22-nə keçən gecə ABŞ Hərbi Hava Qüvvələri İranın Natanz, Fordo və İsfahandakı nüvə obyektlərinə kütləvi zərbələr endirib. İranın Fars xəbər agentliyinin məlumatına görə, Fordo obyektinə cüzi ziyan dəyib. Atom Enerjisi üzrə Beynəlxalq Agentliyi heç bir radiasiya emissiyası olmadığını bildirib.
İran prezidenti Məsud Pezeşkian deyib ki, ABŞ İranın nüvə obyektlərinə endirilən zərbələrə cavab verməlidir.
Baş verən proseslər fonunda İranda mümkün rejim dəyişikliyi barədə Crossmedia.az-a danışan Orta Doğu Araşdırmalar Mərkəzinin rəhbəri, siyasi şərhçi Sədrəddin Soltan bildirib ki, İranda hakimiyyət dəyişikliyi məsələsi daim Vaşinqtonun gündəliyində daim yer allb: “Bununla belə, sözügedən məsələ hər zaman açıq şəkildə bəyan edilməmiş, bəzən dolayı yolla gündəmə gətirilmişdir. Lakin son illərdə İranda müxtəlif sosial və iqtisadi tələblərlə keçirilən etiraz aksiyalarının ABŞ tərəfindən dəstəklənməsi və etirazçıların müdafiə olunması ABŞ-nin İranda mövcud siyasi rejimə qarşı olduğunu bir daha təsdiqləyir.
Hazırda hakimiyyət dəyişikliyi məsələsinin yenidən ön plana çıxması ABŞ-nin İranla bağlı uzunmüddətli strateji planlarının aktiv fazaya keçməsi ehtimalını gücləndirir. ABŞ rəsmiləri bundan əvvəl də dəfələrlə bəyan ediblər ki, İranla bağlı müxtəlif ssenarilər mövcuddur və rejim dəyişikliyi bu ssenarilərdən biri, lakin ən sonuncusu hesab olunur. ABŞ-nin Prezidenti Donald Trampın İran rejiminin dəyişdirilməsi ilə bağlı səsləndirdiyi fikirlər isə bu mövzunun yenidən aktuallaşdığını göstərir”.
Müsahibimiz qeyd edib ki, bu yanaşma həm də ABŞ-nin regionda İranın xarici siyasətinə təsir göstərmək və onu müəyyən mənada nəzarət altına almaq niyyətini ortaya qoyur: “Əgər İranda fundamental dəyişiklik baş verərsə, bu, Yaxın Şərqdə klassik dövlət quruluşlarının gələcəkdə dəyişməsi ehtimalını da artırar. Eyni zamanda, region ölkələrində siyasi islahatların intensivləşməsi prosesinə təkan verə bilər. Bütün bunlar ABŞ-nin Yaxın Şərqə doğru strateji genişlənmə planlarının reallaşması ehtimalını artırır və bölgədə yeni geosiyasi düzənin formalaşmasına zəmin yaradır”.
Ləman Həsənova
22:17 23.06.2025
Oxunuş sayı: 12882
