"Nə ABŞ, nə də İsrail bunu bacaracaq" - RƏY
İranın yüksək rütbəli rəsmisi bildirib ki, İranın İsrailə zərbə endirmək üçün raket çatışmazlığı yoxdur. Onun sözlərinə görə, İran raket hücumlarına dair strategiyasını dəyişib: artıq çoxsaylı raket atışları deyil, yüksək dəqiqlikli və müasir raketlərlə İsrailin kritik hərbi və enerji infrastrukturuna zərbələr endirmək əsas məqsəddir.
Mənbənin iddiasına görə, İran raketləri İsrailin qabaqcıl hava hücumundan müdafiə sistemlərini – o cümlədən THAAD, “Patriot”, “Xets-2”, “Xets-3”, “Davudun Sapandı” və “Dəmir Günbəz” sistemlərini aşmaq qabiliyyətinə malikdir.
Maraqlıdır bu strategiya dəyişikliyi nə ilə bağlıdır? İran blef edir, yoxsa doğrudan da, İsrailə uzunmüddətli perspektivdə müqavimət göstərmək gücünə malikdir.
Bu barədə Crossmedia.az-a danışan hərbi ekspert Üzeyir Cəfərov bildirib ki, hələ İran üçün kritik vəziyyət yaranmayıb: "İran generalları keçən il baş verən müəyyən hadisələrdən sonra hədəflərinə çata bilmədilər. Onlar düşünürdü ki, ikinci cəhd daha ağır olmalıdır. Ona görə də müəyyən ehtiyat toplaymışdılar. İran bu gün kifayət qədər dronlara, raketlərə malikdir. İsrailin ABŞ ilə birlikdə İrana həyata keçirdiyi bu əməliyyatın da bir hissəsi o raket sənayesinin qarşısını almaq üçündür. Buna nail ola biləcəyini düşünmürəm. Amma müəyyən prosesləri zəiflədə və gecikdirə bilər. Lakin prosesi tamamilə dayandırmağa nə İsrailin, nə İranın gücü var. Çünki İranın hərbi sənaye kompleksi bir qədər fərqli, əlaqəli şəkildə çalışır. Uzunmüddətli müharibə nəticəsində İranın da müəyyən çətinlikləri ola bilər.
"İranın müttəfiqləri də bu gün çətin vəziyyətdədir. Son hadisələr fonunda hər bir ölkə öz milli maraqlarını, təhlükəsizliyini təmin etmək üçün qərarlar verir. Hazırda çətin vəziyyətdə olan İran bir zamanlar Rusiyaya kömək etsə də, bu gün özünün çətinlikləri var. İndi Rusiya İrana dəstək verə bilmir. Ona görə də uzunmüddətli perspektivdə mübarizə aparmaq üçün rəsmi Tehrana asan başa gəlməycək", - ekspert əlavə edib.
Ü.Cəfərov, həmçinin əlavə edib ki, İran və İsrail perspektivdəki çətinlikləri qiymətləndirir və böhranı diplomatiya ilə həll etmək istəyirlər.
Fatimə Məmmədova
16:44 21.06.2025
Oxunuş sayı: 9551
