Bu, ölkənin media sahəsindəki irsini beynəlxalq səviyyədə tanıtmaq üçün əvəzedilməz fürsət ola bilər - AÇIQLAMA
Azərbaycanda milli mətbuatın yaranmasının 150 illiyi münasibətilə yubiley medalının təsis edilməsi ölkənin media sahəsində mühüm hadisə kimi qiymətləndirilir. Bu təşəbbüs təkcə jurnalistlərin əməyinin qiymətləndirilməsi deyil, həm də Azərbaycan mətbuat tarixinin qorunması və təbliği baxımından xüsusi əhəmiyyət daşıyır.
Bu barədə Crossmedia.az-a danışan Mətbuat Şurasının sədr müavini, Bakı Dövlət Universitetinin Jurnalistika fakültəsinin dekanı Vüqar Zifəroğlu bildirib ki, yubiley medalının təsis edilməsi ölkənin media tarixinə və jurnalistikanın inkişafına verilən önəmi əks etdirir:
“Azərbaycanda milli mətbuatın yaranmasının 150 illiyinə həsr edilmiş yubiley medalının təsis edilməsi ölkənin media tarixinə və jurnalistikanın inkişafına verilən önəmi əks etdirir.
Bu medalın təsis edilməsi bir neçə aspektdən əhəmiyyətlidir. İlk növbədə vurğulamalıyıq ki, belə bir medalın təsis edilməsi jurnalistlərin və media sahəsində çalışanların əməyinin qiymətləndirilməsi baxımından əhəmiyyətlidir. Bu cür mükafatlar media nümayəndələrinin əməyini stimullaşdırır və onların ictimai əhəmiyyətini vurğulayır.
Yubiley medalının təsis edilməsi eyni zamanda Azərbaycan mətbuat tarixinin qorunması və təbliği baxımından əhəmiyyətlidir. Milli mətbuatın keçdiyi yolu xatırladaraq, gənc jurnalistlərə və cəmiyyətə onun əhəmiyyətini anlatmaq məqsədi daşıyır. Bu eyni zamanda Azərbaycan jurnalistikasının keçmiş olduğu 150 illik tarixi yola bir sayğıdır.
Yubiley medalı dövlətimizin media siyasətindəki prioritetləri əks etdirməsi baxımından da ciddi önəm kəsb edir. Bu addım medianın rolu ilə bağlı dövlətin mövqeyini, mətbuat azadlığının və peşəkar jurnalistikanın inkişafına dəstəyini göstərir.
Və təbii ki, son olaraq da belə bir medalın təsis edilməsi ilə Azərbaycan jurnalistikasının tarixi inkişaf yolunun beynəlxalq səviyyədə tanıdılmasını qeyd etmək lazımdır. Dövlət səviyyəsində Azərbaycan mətbuatının 150 illik yubileyinin qeyd olunması ölkənin media sahəsindəki irsini beynəlxalq səviyyədə də tanıtmaq üçün əvəzedilməz fürsət ola bilər.
Ümumiyyətlə, bu cür təşəbbüslər jurnalistikanın inkişafına müsbət təsir edir”.
Maral Şahverdili
18:29 03.02.2025
Oxunuş sayı: 48568
