Bakı Beynəlxalq İncəsənət Festivalında “Zikra: xatirələr gecəsi” tamaşası nümayiş olunub
Bakı Beynəlxalq İncəsənət Festivalı (BIAF-2026) çərçivəsində Azərbaycan Dövlət Akademik Milli Dram Teatrında “Zikra: xatirələr gecəsi” tamaşası təqdim olunub.
Crossmedia.az xəbər verir ki, Səudiyyə Ərəbistanının Əl-Ula şəhərində yerləşən “Wadi AlFann” beynəlxalq mədəniyyət məkanının sifarişi ilə hazırlanan tamaşa rejissor və xoreoqraf Əkrəm Xanın yaradıcılıq işidir. Layihədə o, vizual rəssam Mənal Əl-Dovayan ilə əməkdaşlıq edib.
Müasir rəqs və klassik hind rəqsinin elementlərini birləşdirən tamaşa yaddaş, qadınların hekayələri və nəsillərarası əlaqələr mövzularına həsr olunub. Ərəb dilində “yaddaş” və “xatırlama” mənalarını verən “Zikra” bir gecəlik ritual formasında qurulub. Səhnə əsərində qadınların bir araya gələrək keçmiş nəsillərin xatirələrini yaşatmaq cəhdləri təsvir olunur.
Tamaşanın orijinal musiqisini hindəsilli amerikalı müğənni və bəstəkar Aditya Prakaş hazırlayıb. Musiqinin ərsəyə gəlməsində 40-dan çox beynəlxalq ifaçı iştirak edib. Layihəyə Əl-Ulanın yerli musiqiçilərinin ifaları da daxil edilib.
Səhnə tərtibatı və geyim dizaynı Mənal Əl-Dovayan tərəfindən hazırlanıb. Rəssam layihədə ənənəvi sənətkarlıq nümunələrini müasir dizayn elementləri ilə birləşdirib. Təbii boyalar və Əl-Ula irsindən qaynaqlanan həndəsi naxışlar tamaşanın vizual üslubunu formalaşdırıb.
Qeyd edək ki, “Zikra”nın dünya premyerası 2025-ci ilin yanvarında Səudiyyə Ərəbistanının Əl-Ula şəhərində, qədim vahənin qayalı kanyonları fonunda açıq səma altında keçirilib. Tamaşa “AlUla Arts Festival 2025” çərçivəsində nümayiş olunub.
23:23 31.10.2026
Oxunuş sayı: 60
