Özbəkistan biznes üçün icarə qaydalarını sərtləşdirir
Özbəkistanda kommersiya obyektlərinin icarəsinin tənzimlənməsi ilə bağlı qaydaların təkmilləşdirilməsi təklif olunub.
Crossmedia.az xəbər verir ki, “Korzinka” şəbəkəsinin təsisçisi, “Ticarət və xidmət” assosiasiyasının sədri Zəfər Haşimov bu təşəbbüslə çıxış edib.
Haşimov müqavilələrin qısa müddətə bağlanması, icarə haqlarının kəskin artırılması və sahibkarların icarəyə götürdükləri obyektlərə yatırdıqları vəsaiti itirmək riskinin mövcudluğuna diqqət çəkib.
O, həmçinin biznes nümayəndələrini icarə haqqının “ağ” və “qara” hissələrə bölünməsindən, eləcə də “zərf”də ödənişlərdən imtina etməyə çağırıb. Haşimovun sözlərinə görə, icarə məbləğinin tam şəkildə rəsmi xərclərdə göstərilməsi sahibkar üçün daha sərfəlidir, çünki bu, vergi tutulan bazanı azaldır.
Özbəkistan Prezidenti Şavkat Mirziyoyev təklifə dəstək verib. O, aidiyyəti şəxslərə Ədliyyə Nazirliyi və İctimai Şura ilə birlikdə iki ay ərzində kommersiya icarəsinin tənzimlənməsi üzrə konkret təkliflər hazırlamağı tapşırıb.
13:14 20.08.2026
Oxunuş sayı: 66
