Fuad Muradov Belarusda fəaliyyət göstərən mərkəzin rəhbərini qəbul edib
Diaspor fəaliyyəti və Azərbaycan mədəniyyətinin xaricdə təbliği istiqamətində görülən işlər müzakirə olunub. Görüşdə soydaşlarımızın yerli cəmiyyətlərə inteqrasiyası və ölkələrarası münasibətlərdə diasporun rolu barədə fikir mübadiləsi aparılıb. Mərkəzin rəhbərinə diaspor fəaliyyətinə verdiyi töhfəyə görə dövlət mükafatı təqdim olunub.
Crossmedia.az xəbər verir ki, Diasporla İş üzrə Dövlət Komitəsinin sədri Fuad Muradov Maksim Tank adına Belarus Dövlət Universitetinin nəzdində fəaliyyət göstərən Azərbaycan Dili və Mədəniyyəti Mərkəzinin rəhbəri Fuad İbrahimovu qəbul edib. Fuad Muradov xaricdə yaşayan Azərbaycan icmalarının və soydaşlarımızın Prezident İlham Əliyevin və Birinci vitse-prezident Mehriban Əliyevanın diqqətində olduğunu bildirib.
Komitə sədri soydaşlarımızın yerli cəmiyyətə inteqrasiyasını, Azərbaycan həqiqətlərinin təbliği, zəngin mədəni irsimizin və mədəniyyətimizin tanıdılması istiqamətində fəaliyyətlərini yüksək qiymətləndirib. Görüş zamanı ölkələr arasında qarşılıqlı münasibətlərin inkişafında diasporun əhəmiyyəti vurğulanıb və gələcək fəaliyyətlə bağlı tövsiyələr diqqətə çatdırılıb. Daha sonra Fuad İbrahimova “Diaspor fəaliyyətində xidmətə görə” Azərbaycan Respublikasının medalı təqdim edilib. O, göstərilən yüksək diqqətə görə Azərbaycan dövlətinə minnətdarlığını bildirib və gələcəkdə də ölkələr arasında ikitərəfli münasibətlərin inkişafı, eləcə də diaspor fəaliyyətinin daha mütəşəkkil şəkildə həyata keçirilməsi üçün səylərini davam etdirəcəyini söyləyib.
22:02 14.08.2026
Oxunuş sayı: 29
