Budanovdan Rusiyaya mesaj: Hər qəpiyin əvəzini ödəyəcək
Ukrayna Rusiyanın ölkəyə vurduğu zərəri ardıcıl şəkildə sənədləşdirir və təcavüzkar dövlətin gələcəkdə ödəməli olacağı tam hesabı hazırlayır.
Crossmedia.az ˝Unian˝-a istinadən xəbər verir ki, bu barədə Ukrayna Prezident Ofisinin rəhbəri Kirill Budanov bildirib.
“Rusiya törətdiyi hər bir cinayətə görə ödəməli və təcavüzün nəticələrinin aradan qaldırılması üçün xərclənən hər qrivnanı kompensasiya etməlidir”, – deyə Budanov vurğulayıb.
Onun sözlərinə görə, Ukrayna üçün Beynəlxalq Zərər Reyestri (RD4U) yeni kateqoriyalar üzrə müraciətləri qəbul etməyə başlayıb. Bu kateqoriyalar zərərçəkmiş əhaliyə dəstək üçün dövlətin humanitar xərclərini, eləcə də minalardan təmizləmə və partlamamış sursatların aradan qaldırılması ilə bağlı xərcləri əhatə edir.
Budanov qeyd edib ki, genişmiqyaslı müharibənin başlanmasından sonra dövlət və yerli hakimiyyət orqanları insanların təxliyəsi, müvəqqəti yaşayış yerlərinin təmin edilməsi, təcili tibbi yardım, reabilitasiya və dağıdılmış evlərə görə kompensasiyalar üçün böyük maliyyə vəsaiti ayırıb.
O bildirib ki, beynəlxalq zərər qeydiyyatı mexanizmlərinin yaradılması Rusiyanın məsuliyyətdən yayınmaq imkanlarını azaldır.
“Düşmən bu zərəri vurub, düşmən də bunun əvəzini ödəyəcək. Ədalət bərpa olunacaq”, – deyə Budanov bildirib.
Qeyd edək ki, Ukrayna daha əvvəl də Rusiyaya qarşı təzyiqləri davam etdirəcəyini və müharibəni dayandırmağa məcbur etmək üçün səylərini artıracağını açıqlayıb.
22:36 14.08.2026
Oxunuş sayı: 38
