Rusiya zavodlarına zərbələr: Azərbaycana təsir varmı?
Rusiya-Ukrayna müharibəsinin davam etməsi Qara dənizdə mülki gəmiçiliyin təhlükəsizliyi ilə bağlı narahatlıqları daha da artırır. Son olaraq Odessa sahillərində azərbaycanlı dənizçilərin olduğu yük gəmisinin pilotsuz uçuş aparatlarının hücumuna məruz qalması münaqişənin mülki dəniz nəqliyyatına təsirini yenidən gündəmə gətirib. Üstəlik, bu, son bir ay ərzində Azərbaycan vətəndaşlarının olduğu gəmiyə ikinci belə hücumdur. Müharibə fonunda Rusiyanın enerji infrastrukturuna endirilən zərbələrin region və dünya bazarına mümkün təsirləri də müzakirə olunur.
Mövzu ilə bağlı REAL partiyasının sədri Natiq Cəfərli Crossmedia.az-a açıqlamasında bildirib ki, Rusiyanın neft emalı zavodlarına endirilən zərbələrin əsas təsiri ilk növbədə Rusiyanın öz iqtisadiyyatına yönəlir:
"Əslində, Rusiyanın neft emalı zavodlarının vurulması daha çox onun özünə təsir edir. Bunun dünya bazarına birbaşa və kəskin təsiri yoxdur. Çünki Rusiya onsuz da sanksiyalar altındadır və Rusiya neftindən emal olunan məhsullar yalnız məhdud sayda ölkəyə ixrac edilə bilir. Əsas təsir Rusiyanın özünədir. Gəlirləri azalır, ölkədə benzin və dizel yanacağı qıtlığı yaranır. Bu da cəmiyyətdə narazılığı artırır".
Ekspert qeyd edib ki, baş verənlərin Azərbaycanın yanacaq bazarına ciddi təsiri gözlənilmir:
"Azərbaycana da demək olar ki, birbaşa təsiri yoxdur. Azərbaycan əvvəllər “premium”markalı neft məhsullarını Rusiyadan alırdı. İndi isə özümüzün istehsal etmədiyimiz premium markalı benzini daha çox Türkmənistan, Rumıniya və digər ölkələrdən idxal edirik. Ona görə də Azərbaycana ciddi təsiri yoxdur".
N.Cəfərlinin sözlərinə görə, buna baxmayaraq, müharibə enerji bazarında ümumi gərginliyi artıran amillərdən biri olaraq qalır:
"Ümumilikdə isə dünyada enerji bazarında müəyyən gərginlik var və Rusiya-Ukrayna müharibəsini də bu gərginliyin tərkib hissəsi kimi qiymətləndirmək olar".
Zərnigar Hüseynli
14:30 01.08.2026
Oxunuş sayı: 68
