ABŞ-nin İsrailə hərbi yardımının dayandırılması çətinləşir
İsrailin ABŞ-dən sifariş etdiyi silahlara görə 2028-ci ildən sonra təxminən 10 milyard dollar əlavə vəsaitə ehtiyac duyacağı gözlənilir. Bu vəziyyət prezident Donald Trampın İsrailə hərbi yardımı dayandırmaq planını çətinləşdirir.
Crossmedia.az xəbər verir ki, “The Wall Street Journal” (WSJ) bu barədə məlumat yayıb.
Məlumata görə, Vaşinqton qarşıdakı iki il ərzində İsrailə təxminən 7 milyard dollar hərbi yardım göstərməyi öhdəsinə götürüb. Lakin 2028-ci ildən sonra ödənilməmiş silah sifarişlərinin maliyyələşdirilməsi məsələsi açıq qalır.
ABŞ Dövlət Departamentinin Konqresə təqdim etdiyi sənədə əsasən, aprelin 1-nə olan məlumata görə, İsrailin mövcud sifarişlərini ödəmək üçün əlavə 10 milyard dollara ehtiyacı olacaq. Bu vəsaitin ABŞ, İsrail və ya hər iki ölkə tərəfindən qarşılanacağı hələ müəyyənləşməyib.
İsrailin Baş naziri Benyamin Netanyahu ABŞ-nin birbaşa hərbi yardımının qarşıdakı 10 il ərzində mərhələli şəkildə dayandırılmasını təklif edib.
ABŞ qanunvericiləri isə maliyyə yardımlarının birgə müdafiə istehsalı və hərbi texnologiyaların inkişafı layihələri ilə əvəzlənməsi imkanlarını nəzərdən keçirirlər.
Bununla belə, mövcud maliyyə öhdəlikləri və uzunmüddətli silah müqavilələri səbəbindən ABŞ-nin İsrailə hərbi yardımının qəfil dayandırılması az ehtimal olunur.
09:52 05.11.2026
Oxunuş sayı: 59
