The Telegraph: ABŞ Polşanı mümkün Rusiya təxribatı barədə xəbərdar edib
ABŞ Polşanı Rusiyanın ölkə ərazisində məhdud hərbi təxribat həyata keçirə biləcəyi ilə bağlı məlumatlandırıb.
Crossmedia.az xəbər verir ki, bu barədə The Telegraph təhlükəsizlik sahəsindəki mənbələrə istinadən məlumat yayıb.
Nəşrin yazdığına görə, mümkün ssenarilər arasında kritik infrastruktur obyektlərinə pilotsuz uçuş aparatları və ya raketlərlə zərbələr, həmçinin Belarus və ya Kalininqrad vilayəti istiqamətindən diversiya qruplarının qısamüddətli sərhəd keçidi yer alır.
Ekspertlərin fikrincə, Moskvanın məqsədi NATO-nun operativ reaksiyaya hazırlığını yoxlamaq və alyansa olan etimadı sarsıtmaq ola bilər.
Məlumata əsasən, Kreml bu cür addımları "təsadüfi səhv" və ya "xilasetmə əməliyyatı" kimi təqdim etməyə çalışaraq genişmiqyaslı hərbi qarşıdurmadan yayınmaq və Qərbi Ukrayna ilə bağlı danışıqlara sövq etmək niyyətində ola bilər.
The Telegraph qeyd edir ki, Polşanın mümkün hədəf kimi seçilməsi Rusiyanın Baltik ölkələri ilə birbaşa qarşıdurmaya getmədən regionun əsas oyunçularından birinə təzyiq göstərmək istəyi ilə izah olunur.
Qeyd edək ki, məlumat The Telegraph nəşrinin mənbələrinə əsaslanır. ABŞ və Polşa rəsmiləri, eləcə də Rusiya tərəfi bununla bağlı rəsmi açıqlama verməyib.
15:22 03.07.2026
Oxunuş sayı: 48
