Azərbaycan Prezidentinin regional əməkdaşlığa növbəti töhfəsi - Bakı-Tbilisi dəmir yolu açılır
Bakı-Tbilisi dəmir yolu xəttinin mayın 26-dan etibarən yenidən sərnişindaşıma məqsədilə fəaliyyətə başlaması regionda nəqliyyat əlaqələrinin genişlənməsi baxımından mühüm hadisə hesab olunur. Uzun fasilədən sonra bu marşrutun yenidən istifadəyə verilməsi həm Azərbaycan və Gürcüstan arasında gediş-gəlişi asanlaşdıracaq, həm də region ölkələri arasında iqtisadi və turizm əlaqələrinin inkişafına əlavə töhfə verəcək. Bu, birbaşa olaraq Azərbaycanın, dövlət başçısı İlham Əliyevin siyasi iradəsinin nəticəsidir. Gürcüstan sözügedən addımı öz təşəbbüsü kimi təqdim etməyə çalışsa da, bu hadisə Azərbaycan hakimiyyətinin regional əməkdaşlığa diqqətinin təzahürüdür.
Məsələ ilə bağlı Azərbaycan Dəmir Yolları QSC-nin mətbuat xidmətindən Crossmedia.az-a bildirilib ki, Azərbaycan və Gürcüstan hökumətləri arasında Birgə Kommunikasiyaya əsasən, 26 may 2026-cı il tarixindən etibarən Bakı-Tbilisi-Bakı marşrutu üzrə sərnişin qatarlarının fəaliyyəti bərpa olunacaq.
Dəmiryolunun açılması ilə əlaqədar olaraq Milli Məclisin deputatı Vüqar Bayramov isə Gürcüstanın Azərbaycanın strateji müttəfiqlərindən biri olduğunu və bunun çox müsbət hal olduğunu qeyd edib:
"Orada yaşayan azərbaycanlılar mütəmadi olaraq ölkəmizə səfər edirlər, eyni zamanda Azərbaycandan da Gürcüstana gedənlərin sayı kifayət qədər çoxdur. Bakı-Tbilisi-Bakı dəmiryolu marşrutunun yenidən bərpası olduqca müsbət hadisədir. Bu marşrut iki ölkə vətəndaşlarının gediş-gəlişini daha da asanlaşdırmaqla yanaşı, turizmin inkişafına da mühüm töhfə verir.
Bununla yanaşı, dəmiryolu əlaqəsinin bərpası Azərbaycan ilə Gürcüstan arasında strateji əməkdaşlığın daha da möhkəmlənməsinə xidmət edir.
Xüsusilə, yay və turizm mövsümünün yaxınlaşdığı bir dövrdə belə bir addım həm vətəndaşlar üçün rahat və sərfəli nəqliyyat imkanı yaradır, həm də digər ölkələrə səfər edən insanlar üçün maliyyə baxımından əlverişli şərait formalaşdırır.
Bir sözlə, bu qərar həm iqtisadi, həm turizm, həm də regional əlaqələr baxımından olduqca əhəmiyyətli və müsbət addımdır".
Məsələ ilə bağlı Gürcüstanda fəaliyyət göstərən “Yurd” Ağsaqqallar Birliyinin sədri Fazil Əliyev Gürcüstan-Azərbaycan arasında fəaliyyət göstərəcək sərnişin qatarının yenidən işə salınması ilə bağlı əldə olunan razılaşmaların böyük maraqla qarşılandığını vurğulaylb:
"Əlbəttə, bu qərar həm Gürcüstan türkləri, həm də ümumilikdə Gürcüstan vətəndaşları arasında müsbət əhval-ruhiyyə yaradıb.
Bu dəfə əldə edilən razılaşmanın artıq reallığa çevriləcəyinə və ayın sonundan etibarən Gürcüstan ilə Azərbaycan arasında sərnişin qatarının fəaliyyət göstərəcəyinə ciddi inam var.
Şübhəsiz ki, bu addım geosiyasi, iqtisadi, mədəni və təhsil sahələrində mühüm nəticələr verəcək. Bildiyiniz kimi, illər boyu Gürcüstandan çoxsaylı gənclər Azərbaycana gedərək təhsil alıblar.
Xüsusilə, humanitar və ictimai elmlər sahəsində təhsil alan soydaşlarımız sonradan geri qayıdaraq öz bölgələrində mühüm rol oynayıblar. Ancaq son 5-6 ildə sərhədlərin bağlı qalması və nəqliyyat imkanlarının məhdudlaşması səbəbindən Azərbaycanda təhsil almaq bir çox ailələr üçün çətinləşmişdi. Bu isə təhsil və maarifçilik sahəsində müəyyən problemlər yaratmışdı.
Digər tərəfdən, “yaxın qonşu uzaq qohumdan yaxşıdır” deyimi burada tam mənası ilə öz təsdiqini tapır. Strateji tərəfdaş olan Azərbaycan və Gürcüstan arasında sərhədlərin uzun müddət bağlı qalması ölkələrarası münasibətlərin müəyyən qədər zəifləməsinə, iqtisadi və sosial inteqrasiyanın ləngiməsinə səbəb olmuşdu. Nəticədə yaranan boşluqdan digər dövlətlərin vətəndaşları daha çox istifadə etməyə başlamışdı. Əvvəllər Gürcüstanda azərbaycanlı turistlərə, iş adamlarına və qonaqlara daha çox rast gəlinirdisə, son illərdə bu mənzərə dəyişmişdi.
Bu gün Gürcüstanda ərəb ölkələrindən, Pakistandan, İrandan və digər regionlardan gələn insanların sayı artıb. Buna görə də, hesab edirəm ki, sərhədlərin açılması və bu qərarın davamlı xarakter alması çox mühüm müsbət nəticələr verəcək".
Nəqilliyyat üzrə ekspert Rauf Ağamirzəyev isə ümumiyyətlə, beynəlxalq daşımaların mövcudluğu özlüyündə mühüm üstünlük hesab olunduğunu bildirib:
"Bakı-Tbilisi dəmiryolu xətti isə bu gün artıq 143 illik tarixini qeyd edir. 143 ildir ki, bu Transqafqaz dəmiryolu xətti Xəzər dənizi ilə Qara dəniz arasında mühüm bağlantı rolunu oynayır.
Yeni regional reallıqlar fonunda hesab edirəm ki, Bakı-Tiflis-Batum xəttinin açılmasına ciddi ehtiyac var. Əgər bu gün Bakıdan Ağstafaya təxminən 5 saat 15 dəqiqəyə getmək mümkündürsə və Tiflisdən Batuma səfər müddəti 5 saatdan 4 saata endirilirsə, sərhəd keçid məntəqələrinin optimallaşdırılması ilə Bakı-Batum marşrutunu ümumilikdə 11 saat ərzində təşkil etmək mümkün ola bilər. Bu isə həm regional bağlantıların güclənməsi, həm də regionun turizm potensialının daha geniş şəkildə açılması baxımından olduqca böyük əhəmiyyət daşıyır".
Elmir Heydərli
11:44 20.05.2026
Oxunuş sayı: 329
