Türk Dövlətləri arasında vətəndaş cəmiyyəti əməkdaşlığı genişlənir
Bakıda Türk Dövlətləri Təşkilatına üzv ölkələrin qeyri-hökumət təşkilatlarının II Həmrəylik Forumu keçirilir.
“Bakı Şəhərsalma Həftəsi” çərçivəsində təşkil olunan tədbirdə Azərbaycan da daxil olmaqla səkkiz ölkədən vətəndaş cəmiyyəti institutlarının nümayəndələri iştirak edir.
Forum Türk dünyasında QHT-lər arasında əməkdaşlığın gücləndirilməsi və ortaq fəaliyyət mexanizmlərinin inkişaf etdirilməsi baxımından mühüm platforma hesab olunur.
Tədbir çərçivəsində ilk dəfə olaraq Azərbaycan-Qırğızıstan, Azərbaycan-Türkmənistan və Azərbaycan-Şimali Kipr QHT-lərinin əməkdaşlıq forumlarının keçirilməsi nəzərdə tutulub.
Son illərdə Türk dövlətləri arasında vətəndaş cəmiyyəti əlaqələrinin genişləndirilməsi istiqamətində keçirilən forumlar beynəlxalq təşkilatlar çərçivəsində koordinasiyalı fəaliyyətin təşviqinə və ortaq təşəbbüslərin formalaşmasına mühüm töhfə verir.
Məsələ ilə bağlı Biosfer İB sədri, ekoloq Qorxmaz İbrahimli Crossmedia.az-la öz fikirlərini bölüşüb:
"Bugün keçirilən forum sayca ikinci forumdur. Tədbir Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi tərəfindən təşkil olunub. Bildiyiniz kimi, Türk Dövlətləri Təşkilatı son illərdə, xüsusilə də 2020-ci ildə baş vermiş Vətən müharibəsində Azərbaycanın qələbəsindən sonra daha da güclənmiş və beynəlxalq müstəvidə mövqeyini möhkəmləndirmişdir.
Bu baxımdan, qeyri-hökumət təşkilatlarının belə bir forum keçirməsi olduqca əhəmiyyətlidir. Xüsusilə, Azərbaycan QHT Agentliyinin bu təşəbbüsə dəstək verməsi təqdirəlayiqdir. Tədbirdə bir çox təşkilatlar iştirak edir. Əsas məqam isə odur ki, bu iş Azərbaycan QHT Agentliyinin dəstəyi ilə yüksək səviyyədə təşkil edilib.
Forum çərçivəsində çox maraqlı və faydalı tədbirlər keçirilir. Mən bu təşəbbüsü alqışlayıram. Bir qədər sonra panel müzakirələri də davam edəcək. Hesab edirəm ki, bu forumun gələcəyi olduqca uğurlu olacaq.
Baxmayaraq ki, Türk Dövlətləri Təşkilatı yeni formalaşan qurumlardan biridir, artıq dünyada öz təsirini göstərməyə başlayıb. Türkdilli xalqlar dünya əhalisinin təxminən iki faizindən bir qədər çoxunu təşkil etsə də, türk milləti tarix boyu dünya siyasətində mühüm rol oynayıb.
Bu gün şahidi olduğumuz proseslər — forumların fəallaşması və Türk dövlətlərinin bir təşkilat ətrafında daha sıx birləşməsi — gələcəkdə daha güclü əməkdaşlıq modelinin formalaşacağına ümid yaradır.
Mən hesab edirəm ki, türk xalqlarının birliyi gələcəkdə beynəlxalq miqyasda mühüm söz sahibi olacaq və dünya sülhünə, əməkdaşlığa və sabitliyə öz töhfəsini verəcəkdir".
Elmir Heydərli
17:12 16.05.2026
Oxunuş sayı: 45
