Ukrayna hərbçiləri cəbhədə ciddi problemlərlə üzləşir
Ukrayna Silahlı Qüvvələrinin hərbçiləri cəbhə xəttində su çatışmazlığı və logistika problemlərinin fiziki tükənməyə səbəb olduğunu bildiriblər.
Crossmedia.az xəbər verir ki, Ukrayna Hərbi Ombudsman Aparatı bu barədə apardığı genişmiqyaslı araşdırmanın nəticələrinə əsasən məlumat yayıb.
Araşdırmaya görə, hərbçilərin 60 faizi mövqelərdə xidmətə başladıqdan sonra ilk ay ərzində tükənmə əlamətləri hiss edir. İkinci ayın sonuna doğru isə hər 10 hərbçidən 8-i bu problemlə üzləşdiyini bildirir.
Sorğuda iştirak edənlərin 83 faizi su çatışmazlığının onlara kritik təsir göstərdiyini qeyd edib. Logistika təminatının olmamasını isə hərbçilərin 76 faizi kritik problem kimi qiymətləndirib.
Bundan əlavə, hərbçilər mövqelərin lazımi səviyyədə təchiz edilməməsindən və komandirlərlə əlaqə qurmaqda çətinlik çəkmələrindən şikayətləniblər.
Araşdırmada rotasiya olmadan 180 gün və daha çox müddətdə mövqelərdə qalan hərbçilər arasında intihar düşüncələrinin yüksək göstəricisi də qeydə alınıb. Bu göstərici 17,3 faiz təşkil edib.
Qeyd edək ki, bundan əvvəl professor Qlenn Dizen Ukraynada vəziyyətin çətinləşdiyini bildirib. O, bunun əsas səbəbləri kimi hava hücumundan müdafiə sistemlərinin və canlı qüvvənin ciddi çatışmazlığını göstərib.
08:00 08.11.2026
Oxunuş sayı: 20
