Türk dünyasında yeni güc birliyi – Bakı-Daşkənd xətti möhkəmlənir
Türk dünyasında əməkdaşlığın və inteqrasiyanın gücləndirilməsi istiqamətində mühüm platformalardan biri olan Türk Dövlətləri Təşkilatı çərçivəsində keçirilən qeyri-rəsmi sammitlər üzv dövlətlər arasında siyasi dialoqun daha da dərinləşməsinə xidmət edir.
Türküstanda baş tutan son sammit də bu baxımdan xüsusi əhəmiyyət daşıyıb və region ölkələri arasında qarşılıqlı etimadın, strateji tərəfdaşlığın və ortaq maraqların daha geniş müstəviyə çıxarıldığını nümayiş etdirib.
Azərbaycanla Özbəkistan arasında ikitərəfli münasibətlər də son illərdə yüksələn xətt üzrə inkişaf edir və strateji müttəfiqlik səviyyəsinə çatıb.
Bu kontekstdə Özbəkistan Prezidenti Şavkat Mirziyoyev tərəfindən Azərbaycan Prezidenti Ilham Aliyevə ünvanlanan təşəkkür və yüksək qiymətləndirmə, həm TDT daxilində əməkdaşlığın gücləndirilməsinə, həm də iki ölkə arasındakı dostluq və qardaşlıq münasibətlərinin daha da möhkəmlənməsinə verilən önəmin göstəricisi kimi çıxış edir.
Məsələ ilə bağlı politoloq Əziz Əlibəyli Crossmedia.az-la öz fikirlərini bölüşüb:
"Azərbaycan-Özbəkistan münasibətləri tarixi müstəvidə dərin köklərə malik olduğu kimi, gələcək Türk dünyasının formalaşmasında da mühüm strateji əhəmiyyət daşıyır.
Türk Dövlətləri Təşkilatı çərçivəsində Türk dünyasının güc mərkəzlərindən biri kimi Özbəkistanın rolu getdikcə daha aydın şəkildə ortaya çıxır. Müsbət inkişaf dinamikasına malik olan bu ölkə, Mərkəzi Asiyanın coğrafi mövqeyi baxımından regionda mühüm inteqrasiya və balanslaşdırıcı dövlət kimi çıxış etmək potensialına sahibdir.
Eyni zamanda, Orta Dəhliz layihəsi və Zəngəzur istiqamətində formalaşan nəqliyyat-kommunikasiya imkanları Azərbaycan-Özbəkistan iqtisadi münasibətlərinin gələcək inkişafı üçün ciddi perspektivlər açır.
Azərbaycanın işğaldan azad olunmuş ərazilərinin bərpası prosesində Özbəkistanın göstərdiyi qardaş dəstəyi də indiki həssas geosiyasi mərhələdə xüsusi əhəmiyyət kəsb edir.
Bu baxımdan, iki ölkə arasında münasibətlər strateji əməkdaşlığın yeni mərhələsinə qədəm qoyaraq, Azərbaycanın enerji sahəsindəki təcrübəsinin Özbəkistanla paylaşılması kimi istiqamətlərlə daha da dərinləşməkdədir".
Elmir Heydərli
10:15 16.05.2026
Oxunuş sayı: 38
