Gürcüstan, Azərbaycan və Türkiyə üçlüyü vahid əməkdaşlıq platforması kimi çıxış edir - RƏY
Gürcüstan və Azərbaycan arasında strateji tərəfdaşlıq münasibətləri regionda siyasi və iqtisadi əməkdaşlığın əsas dayaqlarından biri olaraq qalır. Bu əməkdaşlığın daha da genişləndirilməsi istiqamətində Batumidə keçirilən görüşdə Acarıstan hökumətinin sədri Zurab Pataradze Azərbaycanın Gürcüstandakı səfiri Faiq Quliyev və Batumidəki baş konsulu Fuad Əzizov ilə bir araya gəlib. Tərəflər iki ölkə arasında əlaqələrin müxtəlif istiqamətlər üzrə inkişaf perspektivlərini müzakirə ediblər.
Görüşdə xüsusilə ticarət dövriyyəsinin artması, turizm əlaqələrinin genişlənməsi və nəqliyyat sahəsində əməkdaşlığın gücləndirilməsi diqqət mərkəzində olub. Bakı-Batumi marşrutu üzrə aviareyslərin sayının artırılması planı, həmçinin Acarıstanın turizm və investisiya potensialı ətrafında aparılan fikir mübadiləsi regionun beynəlxalq biznes və iqtisadi platformalar üçün əhəmiyyətini bir daha ön plana çıxarıb.
Məsələ ilə bağlı politoloq Turab Rzayev Crossmedia.az-la öz fikirlərini bölüşüb: "Azərbaycan və Gürcüstan münasibətləri praktik baxımdan sadəcə qonşuluq əlaqələri deyil, qarşılıqlı asılılığa əsaslanan strateji əməkdaşlıq modelidir. Bu iki ölkə bir-birini tamamlayan, bir-birinə ehtiyacı olan dövlətlər kimi çıxış edir. Gürcüstanın enerji təhlükəsizliyi, enerji təchizatı və ümumilikdə geosiyasi sabitliyi baxımından Azərbaycanın rolu mühüm əhəmiyyət daşıyır. Eyni zamanda, Azərbaycanın iştirak etdiyi Şərq–Qərb nəqliyyat dəhlizləri, Orta Dəhliz və digər beynəlxalq layihələr üçün Gürcüstan əsas tranzit ölkələrdən biridir. Azərbaycanın enerji resursları, iqtisadi sərmayələri və genişmiqyaslı əməkdaşlıq imkanları Gürcüstan üçün strateji əhəmiyyət kəsb edir. Digər tərəfdən, Gürcüstan Azərbaycanın dünya bazarlarına çıxışı baxımından vacib bir “pəncərə” rolunu oynayır. Azərbaycanın birbaşa okeana çıxışının olmaması fonunda Gürcüstan vasitəsilə beynəlxalq dəniz və qlobal ticarət şəbəkələrinə inteqrasiya imkanı yaranır. Beləliklə, ölkələr arasında neft və qaz kəmərləri ilə yanaşı, nəqliyyat-kommunikasiya xətləri, dəmir yolu infrastrukturu, beynəlxalq elektrik ötürmə layihələri və fiber-optik kabellər kimi strateji layihələr həyata keçirilir. Bu layihələrin əksəriyyəti regional və qlobal inteqrasiyada Gürcüstanın rolunu daha da artırır. Bu əməkdaşlığın daha da dərinləşdirilməsi və strateji səviyyəyə yüksəldilməsi həm iqtisadi, həm siyasi, həm də mədəni baxımdan əhəmiyyətlidir. Bu, regionda sabitliyin və qarşılıqlı inkişafın güclənməsinə xidmət edir".
O, əlavə edib ki, Gürcüstan, Azərbaycan və Türkiyə üçlüyü geosiyasi və təhlükəsizlik baxımından vahid əməkdaşlıq platforması kimi çıxış edir: "Bu əməkdaşlıq regionun enerji və nəqliyyat təhlükəsizliyinin əsas dayaqlarından biridir. Məlumdur ki, Ermənistan bəzi hallarda Gürcüstanın bu geosiyasi xəttdən uzaqlaşdırılmasına və alternativ regional bloklara yönləndirilməsinə çalışır. Lakin mövcud reallıq göstərir ki, Gürcüstan Azərbaycanın və Türkiyənin daxil olduğu əməkdaşlıq sistemində mühüm və ayrılmaz bir halqa olaraq qalır".
Elmir Heydərli
19:44 14.05.2026
Oxunuş sayı: 52
